Kixtiaj sen ejemplo de on yugo
27
Ijkuak Sedequías, ikoneu Josías, kemach opeu tlamandarouaya ken rey ne Judá, toTEKO okinots Jeremías, 2 niman okijlij: "Xchijchiua keski mekakuetlaxtli niman sen yugo. Kemaj on yugo xtlali ipan mokechkojyo niman xmamalina ika on mekakuetlatli. 3 Kemaj xkintitlanili sen amatlajkuilojli on reyes de Edom, Moab, Amón, Tiro niman on rey de Sidón. In amatlajkuilojli ma kitemakatij on tlajtojkamej yejuan oualajkej Jerusalén, yejuan okitlajpalokoj on rey Sedequías. 4 Xkinnauati ma kijlikan iminreyes ika nejua, nemoTEKO yejuan nochi niueli nikchiua, iDios Israel, nikijtoua: 5 'Ikan noueyi poder onikchijchiu in tlaltikpaktli, on tlakamej niman on yolkej yejuan nemij, niman nikmaka san akin nejua nikneki. 6 Aman tej, nejua yonikintlalij nochi on naciones ipan imauan notekitkau Nabucodonosor, rey de Babilonia. Niman hasta on tepeyolkej yonikinkau ipan imauan para kinmandaros. 7 Nochimej on naciones itech notemakskej, itech ikoneu niman itech ixuiu. Pero yejkos tonajli kej yejua niman ipaís no ijki notemakaskej imintech uejueyimej naciones niman intech on más uejueyixtokej reyes para kinmandaroskej. 8 Niman tla sekimej naciones noso reyes xkinekiskej notemakaskej niman kitekipanoskej Nabucodonosor, nejua nikincastigaros ikan nouisokilistli, ikan mayantli niman ikan kokolistin hasta kaman nochimej yejua kintlankapiyas.9 'Yejua ika, maka xkinkakikan on tiotlajtojkej, on tetlatejtemouiliaj noso on yejuan kiteijliaj tlinon kijtosneki on temiktli, nion on nanaualtin yejuan saman kimatij tlinon nochiuas más sakin niman yejuan mechijliaj maka xmotemakakan itech on rey de Babilonia. 10 On tlinon mechijliaj xmelauak. Tla nenkinneltokiliaj tlinon mechijliaj, yej mechchiualtiskej xkisakan nikan ipan nemopaís, niman nejua nemechchajchayauas para xmikikan. 11 Pero on nación yejuan kinokauilis ma kimandaro on rey de Babilonia, nikauilis ma nokaua ipan itlal para ma chanti niman ompa ma tȏka. Nejua nemoTEKO ijki nikijtoua.'"
12 Nejua, Jeremías, oksejpa nochi onikijlij Sedequías, rey de Judá, niman no onikijlij: "Xmokauilikan ma mechmandaro on rey de Babilonia niman ichanejkauan, niman nemejuamej xnenmikiskej. 13 ¿Tline tej nenkinekiskej nenmikiskej tejua niman mochanejkauan ika on nouisokilistli, on mayantli niman on kokolistli? Pampa ToTEKO yokijtoj ika ijki ipan nochiuas nochi on nación yejuan xkinekis notemakas itech ipoder on rey de Babilonia. 14 Maka xkinchiuili cuenta on tiotlajtojkej yejuan mechijliaj para maka xmotemakakan itech on rey de Babilonia, pampa on tlinon mechijliaj xmelauak. 15 ToTEKO kijtoua ika xejua okinuajtitlan, yej nochi tlen kijtouaj ikan itokatsin xmelauak. Niman ijki, toTEKO tlamis mechsesemanas, niman nemejuamej niman on tiotlajtojkej yejuan xmelauak tlinon okijtojkej, nenmikiskej."
16 No ijki onikinnots on tiopixkej niman nochimej on chanajkej, niman onikinmijlij: "Ijkin kijtoua toTEKO: 'Maka xkinchiuilikan cuenta on tiotlajtojkej yejuan kijtouaj ika xuejkajtika yes oksejpa kinkuepaskej on tlajtlamach yejuan okinkuikej ipan on tiopan de Jerusalén niman okinuajkikej nikan Babilonia. On tlinon mechijliaj xmelauak. 17 ¡Maka xkinchiuilikan cuenta! Yej xmotemakakan itech on rey Nabucodonosor niman nemejuamej xnenmikiskej. ¿Tline tej, nonekis para in ueyikalpan kixoxotoniskej niman kauaskej ken itlaj teolochojli? 18 Tla yejuamej melauak tiotlajtojkej, tla melauak kijtouaj notlajtoltsin, tla ijkon ma nechtlajtlanilikan nejua, niinTEKO yejuan nochi ueli nikchiua, para maka ma nikinkauili ma kiktikan Babilonia on tlajtlamach de oro yejuan sanken onkaj ipan on ueyitiopan, ipan ipalacio on rey de Judá, niman no on yejuan onkaj ne Jerusalén.'”
19-20 (Ijkuak on rey Nabucodonosor okajsik Jeconías, ikoneu Joacim, rey de Judá, para okuikak Babilonia inmiuan nochimej on tlakamej uejueyitekiuajkej de Judá niman de Jerusalén, xokinmiktik on pilares, nion on ueyi pila tlachijchijtli ikan bronce kampa kitekayaj atl, nion on carretas yejuan ipan onkatkaj on pilas pipitikej, nion on okseki tlajtlamach yejuan notekitiltiaya ipan on ueyitiopan.)
21 ToTEKO yejuan nochi ueli kichiua, ijkin kijtoua de on tlajtlamach yejuan onokau ne ipan on ueyitiopan, ne ipan ipalacio on rey niman yejuan onokau ne Jerusalén: 22 “Nochi kiktiskej Babilonia, niman ompa nokauaskej hasta ijkuak nejua niknekis oksejpa nikinuajkis nikan Jerusalén. Nejua, nemoTEKO, ijki nikijtoua.”