Jeremías 26

Kinekij kimiktiskej Jeremías

Ijkuak Joacim, ikoneu Josías, opeu tlamandaroua ken rey ne Judá, toTEKO okinots Jeremías, 2 niman okijlij: "Xmotelketsa ipan ipatio in ueyitiopan, niman xkijto nochi on tlinon otimitsnauatij para tikinmijlis on tojlanmej yejuan uajualeuaj ipan iuejueyikalpanuan niman ikalpanuan Judá para kuajmauistiliaj Dios ipan in ueyitiopan. Maka yej itlaj xtikinmijlis. 3 Kas kinekiskej mitskakiskej niman kauaskej on ken xkuajli nouikaj, niman ijkon nejua xok nikincastigaros de on tlen xkuajli kichiuaj, ken nejua yoniknemilijka nikinchiuilis. 4 Xkimijli ika nejua, iminTEKO, nikijtoua: "Tla nemejuamej xnekitlakamatij on temachtiltin yejuan yonemechmakak, 5 niman xnenkitlakamatij on tlen mechijliaj notekitkauan tiotlajtojkej, yejuan nejua miyekpa onikomintitlan, 6 tla ijkon, nejua nikxoxotonis in ueyitiopan no ijki ken onikxoxotonij Silo kampa onkatka on tabernáculo. Ijkuak ijkon nochiuas, nochi on naciones kitlaueliskej, uetskaskej niman kipijpinauiskej in ueyikalpan Jerusalén."

7 On tiopixkej, on tiotlajtojkej niman on chanejkej nochimej okakkej on tlajtoltin yejuan Jeremías okijtoj ipan on ueyitiopan. 8 Niman ijkuak Jeremías otlan kijtoua on tlinon toTEKO okinauatij kijtos, on tiopixkej, on tiotlajtojkej niman on chanejkej, okajsikej Jeremías niman okijlijkej: "¡Aman timikis! 9 ¿Tline tiktekitiltia itokatsin toTEKO niman tikijtoua ika in ueyitiopan no ijki kixoxotoniskej ken on tabernáculo ne Siló, niman ika in ueyikalpan kixoxotoniskej niman nikan xok yakaj chantis?" Kemaj nochimej on chanejkej onosentlalijteskej ipan on ueyitiopan, niman okiteyeualotoj Jeremías.

10 Ijkuak on uejueyitekiuajkej de Judá okakkej tlinon nochijtikaj, ouajkiskej ijtik on palacio niman oyajkej ipan on ueyitiopan, niman oajsikej hasta ikalakiyan on Yenkuik Tsakuijlotl, niman ompa onotlalijkej para okixtlalokej on tlajtlamach. 11 Kemaj on tiopixkej niman on tiotlajtojkej okimijlijkej on uejueyitekiuajkej niman nochimej on chanejkej: "In tlakatl kimelaua mikis pampa okijtoj ikan in ueyikalpan kixoxotoniskej. Sano nemejuamej onenkakej tlinon okijtoj."

12 Kemaj Jeremías okinnots on uejueyitekiuajkej inuan on chanejkej, niman okimijlij: "ToTEKO yejua onechajtitlan ma nemechijliki ikan itokatsin, ika in ueyitiopan kixoxotoniskej niman on ueyikalpan, ijkon ken yonenkakej. 13 Pero tla nemejuamej kuajli nenmouikaskej niman xok nenkichiuaskej on tlen xkauajli, niman nentlakamatiskej toTEKO Dios, yejua xkuajtitlanis on tlajyouilistli yejuan kijtouaya kaujtitlanis. 14 Niman nejua uej nennechpiyaj ipan nenmomauan. Xnechchiuilikan tlinon nenkinekiskej. 15 Pero yej kemaj, kuajli xmatikan: tla nennechmiktiaj, nemejuamej niman on chanejkej ipan in ueyikalpan, nenkipiyaskej tlajtlakojli pampa nenkimiktiskej sen tlakatl yejuan xkipiya tlajtlakojli, pampa melauak toTEKO onechajtitlan para ma nemechijliki nochi on tlajtlamach."

16 Kemaj on uejueyitekiuajkej niman nochimej on chanejkej okimijlijkej on tiopixkej niman on tiotlajtojkej: "In tlakatl xitlaj okichiu yejuan xkuajli para kimelauas kimiktiskej, yejua san otechijlij ikan itokatsin toTEKO Dios on tlen yejua okijlij."

17 Kemaj sekimej ueuetkej tlayekankej ouajnotelketskej niman okimijlijkej on tlakamej yejuan ompa nemiyaj: 18 "Ipan on tonaltin, ijkuak Ezequías rey katka, Miqueas tiotlajtojketl yejuan ualeuaya Moreset okinnots ikan itokatsin toTEKO nochimej on tlakamej chanejkej Judá. Ijkin okimijlij: 'ToTEKO yejuan nochi ueli kichiua kijtoua: On tepatl Sión kauaskej ken itlaj on tlajli tlaxoponajli. Ne Jerusalén tepayolijtias on tlinon kixoxotoniskej niman on tepetl kampa onkaj on ueyitiopan kojyouas.'

19 'Pero on rey Ezequías niman nochimej on tlakamej chanejkej Judá xokimiktijkej Miqueas. Yej on rey onomojtij ixpan toTEKO niman yejua okitlajtlanilij para ma kimikneli. Yejua ika, toTEKO xokinuajtitlanilij on castigo yejuan yokijtojka kinuajtitlanilis. Pero, tla tikmiktiskej Jeremías Dios kuajtitlanis topan on temojti castigo yejuan yokijtojka kuajtitlanis."

20 No ijki on tiotlajtojketl Urías, ikoneu Semaías, yejuan ualeuaya ne Quiriat-jearim, otiotlajtoj ikan itokatsin toTEKO de on castigo yejuan kiseliskia in ueyikalpan niman nochi in país, no ijki ken aman okijtoj Jeremías. 21 On rey Joacim, on iuejueyitekiuajkauan niman iuejueyitlayekankauan okakkej on tlinon yejua okijtoj, niman on rey kinekiliaya kimiktis. Pero ijkuak Urías okimat ika kinekiyaj kimiktiskej, onomojtij niman ocholojteu para oyaj Egipto. 22 Niman on rey Joacim okontitlan Egipto Elnatán, ikoneu Acbor, niman oksekimej tlakamej para okajsitoj Urías. 23 Yejuamej oyajkej Egipto, okanatoj Urías niman okuikakej ixpan on rey Joacim. Yejua otlanauatij ma kimiktikan niman imikatlakayo ma kontlajkalikan ipan on tlalkontli kampa kintôkaj on mikatsitsimej.

24 Pero Ahicam, ikoneu Safán, ipampa otlajtoj Jeremías, niman okintlapololtij on ueuetkej para maka ma kitemakakan intech on chanejkej para kimiktiskej.