On tetlauelikniu yejuan ualeua norte
25
Ijkuak Joacim, ikoneu Josías, kipiyaya naui xipan ika tlamandarouaya Judá ken rey, toTEKO okimakak Jeremías itlajtoltsin para ma kinmijli nochimej on chanejkej Judá. In yejua achtoj xipan katka ika tlamandarouaya on rey Nabucodonosor ne Babilonia. 2 On tiotlajtojketl Jeremías okinmachistij on tiotlajtojli nochimej on chanejkej Judá niman on chanejkej Jerusalén. Ijkin okinmijlij: 3 "Desde ijkuak Josías, ikoneu Amón, ye kuikaya majtlaktli uan yeyi xipan ika tlamandaroua Judá ken rey, hasta aman, toTEKO nechajnauatijtiu ma nemechijli itlajtoltsin, pero nemejuamej xnenkinekij nenkakiskej. 4 Niman maski toTEKO miyekpa yomechajtitlanilij itekitkauan, on tiotlajtojkej, nemejuamej xnenkinchiuiliaj cuenta, xnenkinekij nenkakiskej nion xnenkinekij nenkitlakamatiskej. 5 On tiotlajtojkej nochipa mechalijlijtiuij: 'Xkajkauakan on ken xkuajli nenmouikaj niman on tlen xkuajli nenkichiuaj. Niman tla ijkon nenchiuaskiaj, nenchantiskej ipan in tlajli yejuan toTEKO omechmakak para nochipa inuan nenmoachtojtajuan.' 6 Yejuamej omechijlikej: 'Maka xkinneltokakan on dioses, yejuan sano nemejuamej onenkinchijchijkej. Maka xkintlakaitakan nion maka xkinmauistilikan, para ijki toTEKO xkualanis, niman xmechajtitlanilis castigo.' 7 Aman, toTEKO kijtoua: 'Nemejuamej xonenkinekej onennechchiuilijkej cuenta. Nennechkualaniaj ijkuak nenkinmauistiliaj on dioses yejuan sano nemejuamej onenkinchijchijkej, niman pampa ijkon nenkichiuaj sano nemejuamej nemopan nenkuajki nemotlajyouijlis.'8 'Yejua ika, toTEKO yejuan nochi ueli kichiua kijtoua: 'Pampa nemejuamej xonenkinekkej onenkakej on tlen onemechijlij, 9 nejua nikinnotsas nochimej on soldados yejuan nemij neka norte niman no on notekitkau Nabucodonosor, rey de Babilonia, para ma ualakan niman ma kuijsokikij in país. Yejuamej kinuijsokiskej nochimej yejuan nikan chantij, niman on naciones yejuan onokej iyeualkan. Nejua nochi nikinxoxotonis. Para nochipa xoxotonki onyas, nokauas se nacion kampa temojtijkan niman kimakasiskej. 10 Nejua nikchiuas para intech yejuamej xok kakistis on iluikuikamej, on pakakuikamej, on nonamiktiliskuikamej, nion on tetl yejuan ika tlakuechouaj xok kakistis, nion xok oksejpa tlikuiskej on tlauiltin. 11 Nochi in país kixoxotoniskej niman xok yakaj chantis. Niman 70 xipan Israel niman nochimej in naciones kinmandaros on rey de Babilonia. 12 Niman ijkuak ajsis on 70 xipan, nejua nikyolkuitis on rey de Babilonia ipampa itlajtlakoluan iuan nochi on nación de on caldeos, nejua nikxojxotonis para yeyika. Nejua nemoTEKO ijki nikijtoua. 13 Ijki nikchiuas ipan in país ken nejua yonikijtoj niman ijkon ken tlajkuilolnestikaj ipan in amamoxtli. Nochi tlinon Jeremías yokijtoj ikan notokatsin ijki nochiuas ipan in naciones. 14 Uejueyi naciones niman on uejueyixtokej reyes no ijki kintlankapiyaskej. Nejua ijki nikintlaxtlauilis ipampa on tlen xkuajli okichijkej.”
Castigo yejuan kiseliskej on naciones
15 ToTEKO, iDios Israel, onechijlij: "Xkita in copa yejuan tentikaj ikan vino, yejuan kijtosneki notemojtij tlauel. Xseli in copa niman xkinoniti nochimej on naciones kampa nejua timitstitlanis. 16 Ijkuak yejuamej koniskej, peuas papatiliuiskej niman kipoloskej intlamachilis ipampa on nouisokilistli yejuan nikinuajtitlanilis."
17 Nejua onikselilij toTEKO on copa, niman onikinonitij nochimej on naciones kampa toTEKO onechontitlan. 18 Nejua onikonitij Jerusalén niman on iuejueyikalpanuan Judá, inmiuan iminreyes niman iminuejueyitekiuajkauan, para onikau nochi xoxotontok, niman para onokau kampa tlamojtiloyan, niman para yeyika ompa nesis ika onikintlauelij niman hasta aman. 19 No ijki onikonitij on rey de Egipto inuan iuejueyitekiuajkauan, niman itlayekankauan, niman nochimej on chanejkej ompa, 20 niman on chanejkej de oksekimej razas yejuan ompa nemij. No onikinonitij nochimej on reyes de on país itoka Us niman de on iminregión filisteos (Ascalón, Gaza, Ecrón niman on de Asdod yejuan sanken ompa chantij) 21 ne Edom, Moab niman Amón; 22 nochimej on iminreyes Tiro niman Sidón; nochimej iminreyes on países yejuan nokauaj itenko on Mar Mediterraneo; 23 on itribus Dedán, Tema niman Buz, niman on kalpanmej kampa tlakamej notsonnakastlanximaj; 24 nochimej on reyes de Arabia; nochimej on reyes de on sesentlamantik razas yejuan chantij ipan on xalpatlajkan; 25 nochimej on reyes de Zimri, de Elam niman de Media; 26 nochimej on reyes yejuan nemij kampaka norte yejuan nemij nisiu noso uejka de yejuamej. Kijtosneki, nochimej on reinojyomej yejuan onokej ipan in tlaltikpaktli. Niman on vino yejuan kijtosneki notemojtij tlauel, sa ika ontlamis konis on rey de Babilonia.
27 Kemaj onechijlij toTEKO: "Xkimijli ika nejua, nemoTEKO yejuan nochi niueli nikchiua, iDios Israel, nikinchiualtia ma konikan hasta ma tlauanikan, ma nisotlakan niman ma uetsikan ipan tlajli para xokaman nokuiteuaskej, ipampa on nouisokilistli yejuan nikinuajtitlanilis. 28 Niman tla yejuamej xkinekij kiseliskej on copa niman xkinekij koniskej, xkimijli: 'ToTEKO yejuan nochi ueli kichiua kijtoua: Maski tla nemejuamej xnenkinekij nenkoniskej, ika onkaj nenkoniskej. 29 Nipeuas nikuajtitlanis on castigo ipan in ueyikalpan de Jerusalén kampa nechmauistiliaj. ¿Tla ijkon, nemejuamej nenkinemiliaj uej xnemechcastigaros? Tej, melauak ika ka. Nejua yej nochimej nikincastigaros, pampa nejua nikuajtitlanis on nouisokilistli para nochimej in chanejkej ipan in tlajli. Nejua, nemoTEKO yejuan nochi niueli nikchiua, ijki nikijtoua.”
30 'Jeremías, tejua xkimijli nochi in tlajtlamach ikan notokatsin. Xkimijli: 'ToTEKO tsajtsi chikauak ikan itlajtol de tlakomonajli desde ne tlakpak, kampa tlayekkan kampa yejua chanti. Chikauak kintsajtsilia ikoneuan, ken tsajtsij on yejuan kipaxouaj uvas ika imikxiuan, kinchikajkatsajtsilia nochimej on tlaltikpaktlakamej. 31 Ichikajkatlajtol onkakisti hasta itlankan in tlaltikpaktli, pampa toTEKO peuas kinyolkuitis niman kintlajtlakolmakas on tlaltikpaktlakamej ipan nochimej naciones. Tlanauatis ma kinmiktikan on xompayejyeuamej. ToTEKO ijki kijtoua.'”
32 ToTEKO yejuan nochi ueli kichiua kijtoua: "On tlajyouilistli yejkos ipan sen nación niman ijkon nosemantias impan nochimej oksekimej naciones. Sen temojmojtij nouijsokilistli peua nokuiteua niman ajsis nochiuiyan ipan in tlaltikpaktli." 33 Ipan on tonajli, on yejuan toTEKO kinmiktis, xintoskej imanian on tlajli. Xakaj kinchokilis, xakaj kuiteuas inmikatlalnakayo para kintȏkas; xintoskej ipan tlajli ken itlaj on xixalistli. 34 ¡Xajmankatsajtsikan, tlayekankej, nemejuamej tlajpixkej yejuan kinyekanaj nokoneuan. Xmoxixinikan niman xmotlalmimilokan! Ijkon xchiuakan pampa yoyejkok on tonajli ijkuak mechmiktiskej, niman nemejuamej mechmiktiskej ken itlaj on borregos yejuan tojtomajkej. 35 On tlajpixkej xuelis cholojteuaskej; on yejuan tlayekankej tlajpixkej xnomanauiskej. 36 On tlajpixkej tsajtsij, ajmankatsajtsij on tlayekankej tlajpixkej pampa toTEKO nochi okimpopoloj on sakayoj. 37 ToTEKO okualan niman okipopoloj on kualtetsitsimej campos. 38 ToTEKO okintlalkauij ikoneuan ijkon ken sen león ijkuak kisa ijtik iteostou para kontejtemoua tlakuajli. Niman impaís ikoneuan kuajli xojxotonis ipampa iueyitlauel toTEKO, niman on nouisokilistli yejuan kuajtitlanis.