Ejemplo de on ome chikiutli higo
24
Ijkuak Nabucodonosor, rey de Babilonia, yokuikaka Jeconías, ikoneu Joacim, rey de Judá, iminuan on uejueyitlayekankej de Judá, on tlamachijchijkej niman on teposchijchijkej, toTEKO onechititij ome chikiutli yejuan tentikatkaj ika on tlakyotl itoka higos yejuan onkatkaj ixpan on ueyitiopan. 2 Sen chikiutli kipiyaya higos yejuan yejyektli, on yejuan achtopa ijiksik, niman on okse chikiutli kipiyaya higos yejuan yopajpalan, sanoyej yopajpalanka nion xok yakaj ueli kikua. 3 Niman toTEKO onechtlajtoltij: "Jeremías, ¿tlinon tikita?" Nejua oniknankilij: "Nikita higos. Seki sanoyej yejyektli, pero on okseki sanoyej yopajpalan. Yejua ika, xok yakaj ueli kikua."4 Kemaj toTEKO onechijlij: 5 "Nejua iTEKO niman iDios Israel, nikijtoua: 'Nikintas on nokoneuan chanejkej Judá, yejuan onikchiu ma kinuikakan ipan impaís on babalonios ken on yejyektli higos niman nikintiochiuas. 6 Yejuamej kuajli nikinmejeuas niman nikchiuas para oksejpa ma nokuepakan ipan in país. Nejua nikan nikchiuas para maka itlaj kimpolos, niman xok kaman nikinxixinis. Yej ken nikintlaltôkaskia para xok kaman nikinkixtis. 7 Nejua nikchiuas para ma kinekikan nechixmatiskej ken iminTEKO; niman yejuamej yeskej nokoneuan niman nejua niyes iminDios, pampa yejuamej nokuepaskej notech ikan nochi iminyojlo.
8 'Pero Sedequías, rey de Judá, niman on iuejueyitekiuajkauan niman on oksekimej yejuan chantij ne Jerusalén yejuan onokajkej ipan in país, noso on yejuan onochantitoj Egipto, yejuamej uej nikintas ken on higos yejuan xok kuajli yejuan xok yakaj ueli kikua. 9 Nikinchiuilis on tlen sanoyej xkuajli para sanoyej ma nomojtikan on naciones de in tlaltikpaktli. On chanejkej ipan on naciones kimpijpinajtiskej, kinuijuikaltiskej niman inka uetskaskej nochiuiyan ipan on países kampa nejua nikinsesemanas. 10 Nikinuajtitlanilis nouisokilistli, mayantli niman on kualolistin, hasta kaman xok yakaj nokauas ipan in país yejuan onikinmakak yejuamej niman iminachtojtajuan.'"