Itech toTEKO onkaj tlamachalistli
23
ToTEKO ijkin kijtoua: "Nentlajyouiskej nenintlayekankauan nokoneuan yejuaj ken nentlajpixkej, yejuan nenkinkauiliaj on noborregos ma nopopolokan, niman ma nosesemanakan!"2 ToTEKO, inDios on israelitas, kimijlia on tlajpixkej yejuan kinyekanaj ikoneuan: "Nemejuamej onenkinsesemankej nokoneuan; onenkichijkej para ma cholojteuakan niman xkuajli onenkintlajpixkej. Pero tlami xmatikan, ika nejua kemaj sanoyej kuajli nemechcastigaros ipampa nochi on tlen xkuajli onenkichijkej. Nejua, nemoTEKO, nikijtoua. 3 Niman sano nejua oksejpa nikinuajuikas on keskimej nokoneuan de on países kampa onikchiua para ma nosesemanakan. Nikinsentlalis niman nikchiuas para oksejpa ma nokuepakan inchan, niman ma kimpiyakan miyekej inkoneuan. 4 Nikintlalilis tlajpixkej yejuan kintlajpiyaskej, para maka nomojtiskej niman maka semej poliuiskej. Nejua, nemoTEKO, nikijtoua."
5 ToTEKO kijtoua: "Yejkos tonajli ijkuak nikchiuas para David ma kipiya sen yolmelajki iuejkakoneu, yejuan rey yes niman tlamandaros ikan tlamatkilistli, yejuan kitechiuilis tlen kuajli niman tlen melajki ipan in país. 6 Ijkuak yejua tlamandaros, Judá xitlaj ipan nochiuas, niman Israel kipiyas yolseuilistli. In yejua itoka yes yejuan ika kitokayotiskej: 'ToTEKO Yejua Totetlankau."
7 ToTEKO kijtoua: "Ajsis tonajli ijkuak yejuamej xok notlajtolmakaskej ijkin: 'Ipampa toTEKO yejuan melauak nemi, yejuan okinkixtij on israelitas Egipto', 8 yejuamej yej ijkin kijtoskej ijkuak notlajtolmakaskej: 'Ipampa toTEKO yejuan melauak nemi, yejuan okinkixtij iuejkakoneuan Israel de neka ipan on país norte, niman ipan on oksekimej países kampa yejua okinsesemanka.' Niman ijkuakon oksejpa chantiskej ipan imintlal."
On xkuajkualtin tiotlajtojkej kinmachistiaj tlinon impan nochiuas
9 On tiotlajtojkej kinmachistiaj in tlajtojli: "Nejua nion xnoyolika ninemi; nochi notlalnakayo sanoyej kuekuetlaka. Nejua ninomati ken sen tlauanki yejuan sanoyej miyek yokonik vino, san ipampa toTEKO niman ipampa iyektlajtoltsin. 10 Ipan in país sa nochi tlakatl auilnemi. Sa nochi tlakatl kichiua on tlin sanoyej xkuajli. On poder kitekitiltiaj para kitechiuiliaj on tlen xkuajli. Yejua ika, toTEKO okitlauelij in tlajli, niman sanoyej yotlauajuak ipan tlajli, niman on sakatlan hasta kosejtok."
11 ToTEKO kijtoua: "Hasta on tiotlajtojkej niman tiopixkej xkuajli nouikaj; Yonikitak ika ipan noueyitiopan yejuamej no kichiuaj on tlin xkuajli. 12 Yejua ika, ipan innemilis sa kenijki nouikaskej, ken tla nejnemiskiaj tlayouatok. Nejua nikchiuas para ma uetsikan. Ijkuak nejua nikinyolkuitis, no nikuajtitlanis impan miyek tlajyouilistli. Nejua nemoTEKO nikijtoua.
13 'Nejua yonikitak ika on tiotlajtojkej de Samaría kichiuaj on tlen nechkualania. Yejuamej kitemachtiaj itiotlajtol on dios Baal, niman ijkon kichiuaj para nokoneuan israelitas ma nopopolokan. 14 Nejua yonikintak on tiotlajtojkej de Jerusalén kichiuaj on tlinon más xkuajli xken on tiotlajtojkej de Samaría. Yejuamej auilnemij niman istlakatij, niman kinyoleuaj on xompayejyeuamej para ma xompayejyeuakan niman maka ma kitlalkauikan inxompayejyeualis. Yejuamej niman on yejuan chantij ipan in ueyikalpan nikinta kenon chanejkej Sodoma niman Gomorra. 15 Yejua ika, nejua nemoTEKO, yejuan nochi niueli nikchiua, nikijtoua ika ijkin impan nochiuas on tiotlajtojkej: Nikinkualtis tlakuajli yejuan sanoyej chichik; nikinonitis atl yejuan kipiya veneno, pampa intech in tiotlajtojkej de Jerusalén ipan opeu nosemoyaua on xompayejyeualistli imanyan nochi in país."
16 ToTEKO, yejuan nochi ueli kichiua, kijtoua: "Israelitas, maka xkinkakikan tlinon kijtouaj on tiotlajtojkej. On tlen kijtouaj nochi tlakajkayaualistli. Nochi on tlajtlamach san yejuamej kinejnemiliaj; on tlinon kijtouaj xnejua onikinmijlij. 17 On yejuan xkineltokaj notlajtol ijkin kijtouaj: 'Nochi kuajli kisas.' Niman on yejuan kinyekana inyoltechikaualis kinmijliaj: 'xitlaj nenkijyouiskej yejuan xkuajli.'"
Jeremías noueyikatsajtsilia
18 Pero nejua nitlajtlani: "¿Akinon oyajka kampa nemi toTEKO ipan se sentlalilistli, niman okitak noso okak itlajtoltsin? ¿Akinon okitlakamat on tlinon yejua okijtoj?" 19 On itlauel toTEKO ken itlaj ajakakiautli, noso ken sanoyej chikauak ajakatl yejuan impan panoua on xompayejyeuamej. 20 Itlauel toTEKO xnoteltis hasta ijkuak yokichiu on tlinon yokinemilij kichiuas. Ajsis on tonajli ijkuak nemejuamej nenkinemiliskej niman nenkasikamatiskej in tlajtlamach.
ToTEKO kijtoua tlinon impan nochiuas on tlakajkayajkej tiotlajtojkej
21 ToTEKO okijtoj: "On tiotlajtojkej xnejua onikinuajtitlan. Maski xonikinnots, yejuamej oisijkayakej otenojnotsatoj ikan notokatsin. 22 Tla yejuamej nemiskiaj ipan on nechkakisiaj kimatiskiaj tlinon kinmijliskiaj nokoneuan, niman notlajtoltsin kiseliskiaj. Tla ijkon, kauaskiaj on xkuajli ojtli niman on tlinon xkuajli kichiuaj."
23 'Nejua niDios yejuan ninemi sano ijki nisiu noso uejka. 24 ¿Akinon uelis niyanas nixpan? Nejua ninemi nochiuiyan. Nejua nemoTEKO nikijtoua.
25 'Yonikak intlakajayaualis on tiotlajtojkej yejuan saman tlajtouaj ikan notokatsin Yejuamej teijliaj ika Dios okinmakak sen tlajojli ipan intemik. 26 Hasta kamanon tlamis on tiotlajtojkej sanken kijtoskej on tlinon xmelauak, on tlinon san yejuamej kinejnemilia? 27 Ikan on temiktli yejuan kitaj niman kemaj notlajtlajtouiliaj, kinchiualtisnekij nokoneuan para ma nechelkauakan, no ijki ken iminachtojtajuan onechelkajkej, niman okimauistilijkej Baal. 28 ¡Tla yakaj tiotlajtojketl temiki, ma kijto ika on san temiktli. Pero tla okiselij notlajtoltsin, ma kiteijli ijkon ken nejua onikijlij! Xuelis yakaj kijtos ika ipolokayo trigo no sano ijki ken on trigo. Nejua nemoTEKO ijki nikijtoua. 29 Notlajtol ken itlaj on tlikauanajli, ken itlaj on martillo yejuan ika kitlapanaj sen tetl. 30 Yejua ika, nikinmixnamiki on tiotlajtojkej yejuan sano yejuamej kinokuikuiliaj notlajtoltsin. 31 Nikinmixamiki on tiotlajtojkej yejuan sano intlajtol yejuamej kjtouaj kitl nejua notlajtol. 32 Yejua ika, nikinmixnamiki on tiotlajtojkej yejuan kitetlajtlajtouiliaj on temiktin yejuan xmelauak. Niman ika on tlinon kijtouaj, kichiuaj para ma nopopolokan nokoneuan. Nejua xonikomintitlan, niman nejua xitlaj onikinnauatij. Yejua ika, yejuamej xkipiyaj tlajtojli para nokoneuan. Nejua, nemoTEKO, nikijtoua."
Noneki itlajtoltsin toTEKO kimelajkaijtoskej
33 Jeremías, tla yakaj tiotlajtijketl noso tiopixki noso chanej ipan in kalpan mitstlajtoltia: "¿Tlinon tlajtojli kipiya toTEKO para tejuamej?" tejua ijkin xkinnankili: “ToTEKO kijtoua ika nemejuamej nemochiuaj sen ueyi tlamamajli para yejua, niman ika yejua san mechajtlajkalis para mechnokixtilis ken tlamamajli.” 34 Niman tla sen tiotlajtojketl noso tiopixki noso yakaj tlakatl kijtos ika nejua nikpiya se yektiotlajtojli yejuan toTEKO onechmakak, nejua nicastigaros yejua niman ifamilia. 35 Ijkuak yakaj kitlajtoltis sen iteixmatkau noso yakaj ifamilia, uelis kijtos: “¿Kenijki technankilia toTEKO? ¿Tlinon yokijtoj?” 36 Pero maka yej oksejpa nenkijtoskej yejua in tlajtojli: "Nikpiya se yektiotlajtojli yejuan toTEKO onechmakak", pampa tla yakaj kitekitiltia, nejua nikchiuas para itlajtoluan ma yetiya ken itlaj tlamamajli. Nemejuamej yonenkipatilijkej on tlinon kijtosnekij on itlajtoltsin Dios on yejuan nemi, nenmoDios, toTEKO yejuan nochi ueli kichiua.
37 Jeremías, xkintlajtolti on tiotlajtojkej: “¿Kenijki technankilia toTEKO? ¿Tlinon yokijtoj?” 38 Niman tla kijtouaj “In yejua on yektiotlajtojli yejuan toTEKO onechmakak”, xkinnankili: “Ijkin kijtoua toTEKO: 'Pampa nemejuamej sanken nenkijtouaj yejua in tlaltoltin yejuan onemechnauatij makasa xtekitiltikan, 39 nejua nemechketsteuas ken tla nenyeskiaj itlaj tlamamajli, nemejuamej niman in ueyikalpan yejuan nejua onemechmakak niman no ijki nenmoachtojtajuan. Niman nemejuamej nemechchiuas para uejka xuetsitij de kampa nejua ninemi. 40 Niman nikchiuas para nochipa ma mechpijpinajtikan niman on pinaualistli xkaman uelis nenkelkauaskej.'”