Nochi tlen onkaj ma kiyekteneua Dios
148
¡Ma tikyekteneuakan toTEKO!¡Xyekteneuakan toTEKO nemejuamej
yejuan nennemij ne ipan cielo!
¡Xyekteneuakan toTEKO nemejuamej
yejuan nennemij ne tlakpak!
2 ¡Xyekteneuakan nemejuamej nemochimej iángeles!
¡Xyekteneuakan nemejuamej isoldados
yejuan nennemij ipan cielo!
3 ¡Xyekteneuakan, nemejuamej tonaltsintli niman metstli!
¡Xyekteneuakan nemejuamej nochimej petlankej sitlalimej!
4 ¡Xyekteneuakan, on cielo ne más tlakpak,
niman tejua, atl yejuan onkaj ipan cielo!
5 Ma kiyekteneuakan toTEKO,
pampa yejua otlanauatij niman nochi onochiu.
6 Yejua okichijchiu nochi para nochipa,
niman okitlalij sen ley para nochipa ijki oyas ken okichijchiu.
7 ¡Xyekteneuakan toTEKO desde nikan ipan tlajli,
nemejuamej temotijkej yolkej
yejuan nennemij ijtik mar kampa sanoyej uejkatlan!
8 ¡Xyekteneua tejua tlapetlanajli niman tejua tejsiutli, tejua nieve niman tejua ayautli!
¡Xyekteneua tejua chikauak ajakatl
yejuan nochi tikchiua tlinon mitsnauatia!
9 ¡Xyekteneuakan nemejuamej tepemej niman tepetsitsimej!
¡Xyekteneuakan nochimej nemejuamej kojtlakijlomej
niman nemejuamej cedroskojtin!
10 ¡Xyekteneuakan nemejuamej yolkej yejuan nennemij kalpan
niman nemejuamej tepeyolkej,
nemejuamej yolkej yejuan nenpatlanij niman nemejuamej yolkej yejuan nemoteuilanaj!
11 ¡Xyekteneuakan nemejuamej reyes de nochi in tlaltikpaktli
niman nochimej nemejuamej naciones!
¡Xyekteneuakan nochimej nemejuamej yejuan nentlayekanaj
niman nentlamandarouaj ipan in tlaltikpaktli.
12 ¡Xyekteneuakan nemejuamej tlakamej niman siuamej,
nemejuamej kojkonej niman ueuentsitsimej!
13 ¡Nemochimej xyekteneuakan itokatsin toTEKO,
pampa itokatsin más ueyixtikaj xken intoka oksekimej!
¡Iueyilis onkaj ipan cielo niman ipan tlajli!
14 ¡Yejua yokinmakak poder on itlapejpeniluan!
¡Xyekteneuakan nochimej nenyolchipajkej itech Dios,
nemejuamej yejuan nenikoneuan israel
niman yejuan nemij nisiu itech!
¡Ma tikyekteneuakan toTEKO!