ToTEKO san on israelitas okiminmakak itlanauatiluan
147
¡Ma tikyekteneuakan toTEKO!¡Sanoyej kuajli para tikuikatlaliskej toDios!
¡Ijuak ijkin tikchiuaj, sanoyej tipakij
pampa kimelaua ma tikuikatlalikan.
2 ToTEKO oksejpa kichijchiua on ueyikalpan Jerusalén,
niman kinuajuika on israelitas yejuan okinuikakaj Babilonia.
3 Yejua kinyoltlalia yejuan sanoyej najmanaj,
niman kimpajtia kampa nokokouaj.
4 Yejua kipoua keski sitlalin onkaj,
niman cada se kitokayotia.
5 ToTEKO sanoyej ueyixtikaj,
niman kipiya ueyi poder;
ikajsikamatilis xkaman tlamis.
6 ToTEKO kinueyiteneua yejuan yolyemankej,
pero kinmiknotlalia hasta ipan tlajli on xompayejyeuamej.
7 Xkuikatlalikan toTEKO ikan tlaxtlauijli.
Xkuikatlalikan toDios, ikan on tlatsotsonajli arpa.
8 Yejua kichiua para ma tlamoxtemi ipan on cielo,
kuajtitlani kiautli ipan in tlajli,
niman kichiua para ma onya xojtli ipan on tepemej.
9 Yejua kintlakualtia on yolkej,
niman kintlakualtia inkoneuan on tektotomej ijkuak apismikij.
10 Ipakilis toTEKO xonkaj ipan on caballo
yejuan sanoyej kojtik,
nion ipan ikojtilis on tlaltikpaktlakatl.
11 Yej yejua kipaktiaj yejuan kitlakaitaj,
yejuan kitlaliaj inyojlo ipan itetlajsojtlalis
yejuan xkaman tlamis.
12 Nemejuamej chanejkej Jerusalén, xyekteneuakan toTEKO;
Nemejuamej chanejkej ipan on tepetl Sión,
xkueyiteneuakan nemoDios,
13 pampa yejua kuajli kintsakutikaj motsakuijlouan
niman kintiochijtikaj mokoneuan.
14 Yejua kuajki yoltlalijli ipan moueyitlalpan,
niman mitstlakualtia ikan on más kuajli trigo.
15 Yejua kuajtitlani itlanauatil ipan in tlaltikpaktli,
niman on itlanauatil amanaman yejko.
16 Yejua kichiua para ma tlasekuuetsi,
ken kisouaskia on tojmitl de lana.
Niman kichiua para ma xini ajuichsekutli ipan tlajli
ken kixiniskia tlalteutli.
17 Yejua kuajxinia on tejsiutli ken itlaj tekuechtli.
Ikan on sekutli yejuan kuajtitlani, xakaj ueli kixikoua.
18 Pero san ikan itlanauatil, on hielo pati.
Yejua kichiua para ma ajaka, niman on atl peua notlaloua.
19 ToTEKO okimakak Jacob, yejuan no itoka Israel,
on itlanauatiluan niman ileyes.
20 Pero xijki okichiu iminuan oksekimej naciones,
yejuan xkaman okixmatkej itlanauatiluan toTEKO.
¡Ma tikyekteneuakan toTEKO!