Yekteneualistli ipampa on tlen okichiu Dios
146
Ma tikyekteneuakan toTEKO.Nikyekteneuas toTEKO ika nochi noalma.
2 Nochipa niyekteneuas toTEKO chika ninemi.
Ninokuikatis kuikamej de yekteneualistli chika ninemi.
3 Maka xtlali moyojlo intech on tlakamej yejuan uejueyixtokej,
pampa on san tlakamej yejuan xuelij temakixtiaj.
4 Ijkuak mikij, tlaltiaj,
niman ipan on tonajli tlami nochi iminplanes.
5 Pero sanoyej paki on yejuan kiselia paleuilistli
itech iDios Jacob
on yejuan kitlalia nochi itlamachalis itech iTEKO Dios.
6 Yejua okichijchiu on cielo, in tlaltikpaktli, on mar,
niman nochi tlen onkaj impan.
Yejua nochipa kichiua on tlen kijtoua.
7 ToTEKO kinchiuilia tlen melajki on yejuan tlajyouiyaj
niman kintlakualtia on yejuan apismikij.
Niman toTEKO kinmakaua on yejuan tsakutokej
maski xitlaj kichiuaj.
8 ToTEKO kinmixtlajtlapoua on yejuan koxkatsitsimej.
ToTEKO kinketsteua yejuan xintokej.
ToTEKO kintlajsojtla on yejuan yolmelajkej.
9 ToTEKO kinmanauiya on yejuan xchanejkej
niman kipaleuiya on yejuan iknomej niman on siuakaualtsitsimej.
Pero kichiua para on yejuan xkuajkualtin tlakamej
ma kipolokan iminojui.
10 Ay nemejuamej chanejkej Jerusalén,
moTEKO tlamandaros nochipa.
MoDios tlamandaros para yeika.
Xikyekteneuakan toTEKO.