Nochi tlakatl ma kiueyiteneua toTEKO
145
Nimitsueyilis, noDios niman noRey,niman nimitsyekteneuas para nochipa.
2 Mojmostla nimitsyekteneuas;
nikinmijlis nochimej ika sanoyej tiueyixtikaj para nochipa.
3 Sanoyej ueyixtikaj toTEKO,
niman yejua, kimelaua yekteneualistli.
On iueyilis, xkaman uelis tikajsikamatiskej.
4 On tatajtin niman inkoneuan yejuan tlakatitiuij
nochipa kiueyiteneuaskej motekiu,
niman ma kiteijlikan nochipa on yejuan uajnentiaskej,
nochi tlen yotikchiu ikan moueyipoder.
5 Kiteneuaskej ken sanoyej kualtsin moueyilis,
niman nejua nikixtlalos on uejueyi tlajtlamach yejuan yotikchiu.
6 Kiteneuaskej ken temojtij uejueyi tlajtlamach yotikchiu
ikan moueyipoder,
niman nejua niktetlajtlajtouilis de moueyilis.
7 Kiteneuaskej ken sanoyej tikuajli,
niman pakatsajtsiskej ika tejua tiyolmelajki.
8 ToTEKO yolyemanki niman teikneliani;
xnimantsin kualani,
niman sanoyej tetlasojtla
ikan sen tetlajsojtlalisli yejuan xkaman tlamis.
9 ToTEKO kuajli iyojlo iminuan nochimej,
niman ika iueyiteiknelilis
sanoyej kuajli cuidaroua nochi on tlen okichijchiu.
10 NoTEKO, ¡Ma mitsueyiteneua, nochi on tlen otikchijchiu!
¡Ma mitsyekteneuakan nochimej yejuan yolchipajkej mixpan!
11 ¡Ma kijtokan ken sanoyej ueyixtikaj kampa titlamandaroua!
¡Ma kiteijlikan nochi tlen yotikchiu ikan moueyipoder!
12 ¡Nochi tlakatl ma kijlikan ika tejua sanoyej tikpiya poder
niman sanoyej ueyixtikaj kampa titlamandaroua!
13 Kampa titlamandaroua onyas para nochipa,
niman xkaman tlamis ika titlamandaros.
14 Tejua toTEKO tikinkuiteua yejuan uetsij,
niman tikinyolchikaua yejuan najmanaj.
15 Nochimej yejuamej mitstejtemouaj para tikimpaleuis,
para tikiminmakas tlen kikuaskej ijkuak apismikij.
16 Tejua timomatlapoua niman tiuajtlatiochiua
para tikmaka tlakuajli nochi tlen yoltikaj.
17 ToTEKO nochi kichiua tlen melajki;
nochi itekiu kichiua ikan kuajli iyojlo.
18 ToTEKO nisiu nemi iminuan on yejuan kinotsaj,
yejuan kinotsaj melauak ikan nochi inyojlo.
19 Yejua kiminmaka tlinon kitlajtlaniliaj on yejuan kitlakaitaj.
Ijkuak kitlajtlaniliaj ma kimpaleui,
yejua kinkaki niman kinmanauiya.
20 ToTEKO kinmejeua on yejuan kitlajsojtlaj,
pero kimpopoloua on yejuan xompayejyeuamej.
21 ¡Nejua nikueyiteneuas toTEKO!
¡Nochimej ma kiueyiteneuakan iyektokatsin,
aman niman para nochipa!