Sen rey kimaka tlaxtlauijli Dios
144
¡Nikyekteneua noTEKO, yejuan notemanauijkau!Yejua, nechtlayejyekoltia niman nechititia ken nitlauijsokis
para uelis nitetlanis ipan guerra.
2 Yejua, notlajsojkaikniu yejuan nochipa nouan nemi,
yejua itech ninomanauiya,
yejua itech, más kuajli niniyana niman nechmanauiya.
Yejua, ken itlaj noescudo yejuan ika ninomanauiya.
Yejua, kichiua para on chanejkej de on kalpanmej
ma nikintlankapiya.
3 NoTEKO,
¿Tline tikita ken sanoyej ueyixtikaj sen tlaltikpaktlakatl?
¿Tline ipan titlacha niman sanoyej tiktlajsojtla?
4 Sen tlaltikpaktlakatl inemilis ken itlaj ijyotl,
noso ken sen tlaseuajlotl yejuan san panotikisa.
5 NoTEKO, xkolocho niman xtlapo on cielo, niman xuajtemo.
Xkinmatoka on tepemej para popokaskej.
6 Xchiua ma tlapetlani,
ijkon ken tikinmotlaskia ika motlaminaluan on motlauelikniuan
para ontlatlaksaskej sa kanika.
7 Xkuajtlali moma desde ne tlakpak,
niman xnechmanaui de on miyekej notlauelikniuan
yejuan ken itlaj mar uejkatlan.
Xnechmanaui inmak on xkuajkualtin tlakamej
yejuan xchanejkej,
8 yejuan xkijtouaj tlen melauak,
yejuan hasta kuiteuaj inyekma noso kitlaliaj inyelpan
para notlajtolmakaj ijkuak tlakajkayauaj.
9 NoTEKO, nimitskuikatlalis ikan sen yenkuik kuikatl,
ninokuikatis ikan on tlatsotsonajli salterio.
10-11 Tejua tikimpaleuiya on reyes para ma tetlanikan.
Tejua otikmanauij motekitkau David.
Aman nejua no xnechmanaui
para maka nechmiktiskej ikan espada.
Xnechmanaui inmak on xkuajkualtin tlakamej
yejuan xchanejkej,
yejuan xkijtouaj tlen melauak,
yejuan hasta kuiteuaj inyekma
noso kitlaliaj inyelpan para notlajtolmakaj ijkuak tlakajkayauaj.
12 Tokoneuan kualtsin noskaltiskej,
kenon xochimej ipan sen xochitlan.
Tochpochuan sanoyej kualtsitsimej yeskej,
kenon pilares yejuan kimamajtokej sen palacio.
13 Tokueskonuan kuajli tetentiaskej,
sanoyej tetentiaskej ikan nochi on tlajtlamach tlen yotlak.
Toborregos sanoyej miyekiyaskej,
hasta ajsis miles ipan on campos kampa nemij toyolkauan.
14 Touakaxuan pilouajtiskej,
niman xsan uetsikej inkoneuan.
Xakaj mojkatsajtsis ipan tokalpanojuan.
15 ¡Sanoyej pakij, nochimej on yejuan kipiyaj nochi in!
¡Sanoyej pakij, on yejuan toTEKO yejua iminDios.