Motech tejua niktlalia nochi noyojlo
143
NoTEKO, xkaki noueyikatsajtsilis;xkaki tlinon nimitsiknotlajtlanilia.
¡Xnechnankili, pampa tejua tiyolmelajki
niman nochipa titechkaki.
2 Maka xkinta notlajtlakoluan,
nejua akin nimotekipanojkau,
pampa mixpan tejua, xakaj kuajli.
3 Notlauelikniuan kinekij nechmiktiskej;
xok ueli ninomanauiya imintech.
Nechchiualtiaj ma ninemi kampa tlayouatok,
ken kampa nemij on yejuan yomikkej.
4 Ninemi sanoyej xkuajli.
Xok nikpiya tlamachalistli;
noyojlo sanoyej yonopopoloj.
5 Nikelnamiki nochi on tlen yeuejkaui otikchiu,
niman nikixtlaloua nochi on uejueyi tlajtlamach tlen otikchiu.
6 Motech tejua nikintelketsa nomauan;
nimitstejtemoua, ken niktejtemoua atl ijkuak sanoyej namiki,
no ijki kenon tlaluaktli yejuan kineki atl.
7 NoTEKO, ¡nimantsin xnechnankili,
pampa semi ye nimiktikaj!
Maka xmoneneki tinechpaleuis,
pampa tlamo ninemis iminuan on mikatsitsimej.
8 Cada kualkan xnechititi on motetlajsojtlalis
yejuan xkaman tlamis,
pampa motech niktlalia nochi noyojlo.
Xnechititi kenijki kuajli ninouikas,
pampa motech ninoueyikatsajtsilia.
9 Xnechmanaui noTEKO intech on notlauelikniuan,
pampa motech nikneki ninomanauis.
10 Xnechmachti kenijki nikchiuas tlinon tejua tikneki,
pampa tejua tinoDios.
¡On mokuajli Espíritu ma nechuika ipan sen kuajli ojtli!
11 NoTEKO, ¡xnechmanauili nonemilis
para motokatsin kiselis ueyilistli!
Pampa tejua tiyolmelajki, ¡xnechkixti ipan in tlajyouilistli!
12 Pampa tejua nochipa tinechtlajsojtla,
¡xkinmikti on notlauelikniuan!
¡Xkinmikti nochimej on notlauelikniuan,
pampa nejua nimotekipanojkau!