NoTEKO, tejua tinotemanauijkau
142
Nejua chikauak ninoueyikatsajtsilia itech toTEKO;chikauak nikyemankatlajtlanilia para ma nechikneli.
2 Nikixpantilia tlinon nechajmana,
niman nikijlia tlinon nikijyouiya
3 ijkuak sanoyej ninajmanaya.
Tejua noTEKO, otikmat tlinon nopan nochiuaya
ipan on ojtli kampa yonechtlatlalilijkaj.
4 Ijkuak nontlacha noyekmakopa,
xakaj nikita uajlau para nechpaleuis.
¡Xnemi akin nechmanauis!
¡Xnemi akin kinekis nechpaleuis!
5 NoTEKO, motech ninoueyikatsajtsilia ikan nochi noyojlo,
niman nimitsilia:
"Tejua tinotemanauijkau,
san tejua nimitspiya ipan in tlaltikpaktli
yejuan uelis tinechpaleuis."
6 Xkaki ika nimitsnotsa chikauak,
pampa nejua semi xok nikojtik.
Xnechmanaui de on yejuan nechtlaueltotokaj,
pampa yejuamej más kojtikej xken nejua.
7 Xnechkixti ipan in tlajyouilistli,
para ijkon, uelis nimitsyekteneuas.
Ijkuak on yolchipajkej kitaskej ika yotinechpaleuij,
uajlaskej niman pakiskej nouan.