Xnechpaleui noTEKO para maka nikchiuas tlen xkuajli
141
Motech ninoueyikatsajtsilia noTEKO:¡nimantsin xnechpaleuiki!,
¡xnechkaki ijkuak nimitsnotsa!
2 Xseli noueyikatsajtsilis kenon ajuiyak poktli
ijkuak kitlatiaj on kopajli mixpan.
Niman nomauan yejuan nikintelketsa mixpan,
xkita kenon sen uentli yejuan mitsuentlaliliaj ijkuak tiotlak.
3 NoTEKO, xnechtelti ijkuak itlaj xkuajli nikijtosneki;
xnechpalui ma ninotenijmati ijkuak nitlajtlajtoua.
4 Xnechpaleui maka tlamach ma niknejnemili tlen xkuajli.
Maka tinechkauilis ma nikchijtinemi tlen xkuajli,
nion maka iminuan nitlakuas on xompayejyeuamej
ipan iminiluiuan.
5 Tla sen tlakatl yejuan yolmelajki nechcastigaroua,
kijtosneki nechnekilia tlen kuajli.
Tla nechajua, ken nechkuatekiskia ikan on aceite ajuiyak.
Nochi on, nikselis ikan paktli.
Pero nejua nochipa nimitstlajtlanilis
para xkincastigaro on xompayejyeuamej.
6 Ijkuak intlayekankauan on xompayejyeuamej kinuajxiniskej
de on teostotl,
kimatiskej ika melauak tlen onikinmijlij.
7 Iminomiyouan chajchayauiskej ipan on imintlalkon,
ken ijkuak kixoponiaj on tlajli niman uajpankisaj temej.
8 NoTEKO niman noDios,
nejua motech nontlacha para xnechpaleui.
Motech nikneki niniyanas;
maka xnechtlalkaui.
9 Xnechmanaui maka nonuetsis kampa yonechtlatlalilijkej,
kampa yonechtlatlalilijkej on xompayejyeuamej.
10 On xompayejyeuamej,
yej yejuamej ompa ma uetsitij ipan intlaltlaliuan,
pero nejua, xnechpaleui kuajli ma nipano.