Ueyikatsajtsilistli para Dios ma kimanaui yejuan kimiktisnekij
140
NoTEKO, xnechmanaui intech on xkuajkualtin tlakamej; xnechcudaro de on tlakamej sanoyej tlauelejkej,
2 de on yejuan san kinejnemilijtokej kitechiuiliskej tlen xkuajli
niman san ika nokauaj kipeualtijtinemij tlauejli.
3 Nejsij kenon kouamej;
ijkuak tlajtouaj,
intlajtol kichiua para tepajsoloua ken itlaj mikapajtlia de kouamej.
4 NoTEKO, xnechejeua maka niuetsis ipan impoder;
xnechejeua de on tlakamej sanoyej tlauelejkej
yejuan kinekij ma niuetsi.
5 On tlakamej noueyimatkej okitlalikej sen tlatlalijli
para nechajsiskej;
okintlalijkej mekamej niman matlatl,
ipan ojtli para onechtlatlalilijkej.
6 Nejua yonikijlij noTEKO:
"Tejua tinoDios;
xkaki tej, ken chikauak nimitsiknotsajtsilia."
7 NoTEKO, tejua tinoUeyitemakixtijkau;
No ijki ken sen escudo nechpaleuiya
para xnechmaj ikan tlaminajli ipan nouijsokilistli.
8 NoTEKO,
maka xmaka tlinon kineki on tlakatl xompayejyeua;
maka xkauili ma kichiua on tlen kinemilia kichiuas.
9 On yejuan notlauelikniuan,
tejua xchiua maka ma tetlanikan;
On tlauelijli yejuan nechnekiliaj,
sano yejuamej impan ma uetsi.
10 Impan ma xini tlixochtli;
ma kominxinikan ijtik tlaltekontli
kampa xokaman uajkisaskej.
11 Ma popoliuikan ipan in tlaltikpaktli on yejuan tlakajkayauaj;
on tlen xkuajli, nochipa ma kintokatinemi on xkuajkualtin tlakamej yejuan sanoyej tlauelejkej niman ma kinmikti.
12 Nejua nikmatstikaj ika toTEKO,
kuajli ipan tlacha yejuan mayanki
niman kipaleuiya yejuan itlaj ika kitlajyouiltiaj.
13 Ika tlen melauak on yolchipajkej mitsueyiteneuaskej;
¡on tlakamej yolmelajkej chantiskej mixpan!