ToTEKO kuajli techixmati
139
NoTEKO, tejua yotinechixtlaloj,niman kuajli tinechixmati.
2 Tejua tikmati ijkuak ninotlalia niman ijkuak ninotelketsa.
Maski ninemi uejka de tejua, ueli tikmati on tlen niknemilia.
3 Tejua tikmati on ojtli yejuan niknejnemi
ijkuak niuajnokuiteua kualkan,
niman tikmati kanon nikochi ijkuak tlayoua.
Nochi tikmati tlinon nikchiua desde kualkan hasta tlayoua.
4 NoTEKO, maski xe nikpiya nokamak on tlajtojli
yejuan nikijtos,
tejua ye tikmatstikaj on tlen nikneki nikijtos.
5 Tejua nochipa tinemi noyeualkan,
niman momauan nopan tikintlalia
para tinechcuidaroua niman tinechmanauiya.
6 On tlen tikamti de nejua sanoyej tetlatlachaltij.
Para nejua, on sanoyej ueyi kijtosneki
hasta xniueli nikajsijkamati.
7 ¿Kanon niuelis nias, kampa xnemi moEspíritu?
¿Niman kanon nonniyanas kampa xtinechitas?
8 Tla nitlejkoskia iluikak, tejua ompa tinemi,
niman tla nitemoskia uejkatlan ijtik in tlaltikpaktli,
no ompa tinemi.
9 Tla nipatlaniskia para kampaka ikisayan tonaltsintli,
noso nonchantiskia kampa itlamiyan on mar
kampaka ikalakiyan tonaltsintli,
10 Hasta ne tinechmayanaskia,
niman moyekmatsin xnechmakauaskia.
11 Tla niknekiskia niniyanaskia kampa tlayouatok,
noso tla niknekiskia on tlauijli nokuepaskia tlayoualotl,
12 on tlayoualotl xnechiyanaskia.
Niman on tlayouajlotl sanoyej petlaniskia ken ijkuak tlajokaj.
¡Ijkon nochiuaskia
pampa para tejua on tlayouajlotl niman tlauijli sano ijki!
13 Tejua otikchijchiu nochi notlalnakayo;
tejua otinechchijchiu ijtik nonanaj.
14 Nimitsyekteneua pampa sanoyej tinechtlatlachaltia.
Sanoyej tetlatlachaltij on tlen otikchiu,
niman ikan nochi noyojlo nikmati ika melauak.
15 Tejua kuajli otikitak kenijki nochijtiaya notlalnakayo,
chika ninochiuaya san ichtaka,
chika ninochijtiaya ijtik nonanaj.
16 Tejua kuajli otikitak ken opeu nochijtiu notlalnakayo.
Nochi tlen ipan nonemilis nochiuaskia,
yotiktlalijka ipan on moamamox.
Maski xe nitlakatiya, tejua otiktlalij keski xipan ninemis.
17 NoTEKO, sanoyej kualtsin para nejua on motlamachilis.
¡Nochi in tlajtlamach, sanoyej miyek!
18 Tla nejua nikpouaskia,
nikitaskia ika más sanoyej miyek
xken on xajli yejuan onkaj atempan.
Niman ijkuak nitlacha nikita ika sanken nouan tinemi.
19 Ay Dios, xkinmikti on xkuajkualtin tlakamej;
xkinmejkuani notech on yejuan temiktiaj.
20 Yejuamej tlamach mitsijtouiliaj
niman san nenka kitekitiltiaj motokatsin.
21 NoTEKO, sanoyej nechkualaniaj on yejuan mistlauelitaj,
niman nikintlajyelita on yejuan mitsyakapanauiyaj.
22 ¡Sanoyej nikintlajyelita ikan nochi noyojlo!
No nikimpiya ken notlauelikniuan!
23 Ay Dios, xnechixtlalo niman xkita noyojlo;
xnechtlatlata niman xkita notlamachilis.
24 Xkita tla niau ipan on ojtli yejuan xkuajli,
niman xnechyekana ipan on kuajli ojtli
yejuan nechmakas nemilistli para nochipa.