Kimakaj tlaxtlauijli toTEKO
138
Nimitsmakas tlaxtlauijli noTEKO ikan nochi noyojlo;nimitskuikatlalis inmixpan on uejueyixtokej ángeles.a
2 Ninotlakuantelketsas imelajkan moyektiopan
para nimitsmakas tlaxtlauijli
ipampa motetlajsojtlalis yejuan xkaman tlamis
niman pampa xkaman titechkaua,
niman pampa otiktlalij más ueyixtikaj
xken nochi okseki tlajtlamach
moyektokatsin niman motlajtoltsin.
3 Ijkuak onimitsnots otinechnankilij,
niman más otinechmakak chikaualistli ipan noalma.
4 NoTEKO,
nochimej on reyes de in tlaltikpaktli mitsueyiteneuaskej
ijkuak kakiskej motlajtoltsin.
5 Kuikatlaliskej ipampa nochi on tlen toTEKO kichiua,
pampa iueyilis sanoyej ueyixtikaj.
6 Maski toTEKO nemi ne tlakpak,
impan tlacha on yejuan yolyemankej,
pero on yejuan noueyimatij,
kineki uejka ma nemikan pampa xkintasneki.
7 Ijkuak itlaj xkuajli nopan nochiuasneki,
tejua tinechmanauiya para maka nimikis.
Ikan mopoder tinechmanauiya
intech on notlauelikniuan yejuan sanoyej nechtlauelitaj.
8 ¡ToTEKO kichiuas on tlen onechprometerouilij
nochiuas ipan nonemilis.
NoTEKO, motetlajsojtlalis xkaman tlamis.
¡Maka yej xtitlamis, on tlen yotikijtoj tikchiuas nouan!