Iueyitetlajsojtlalis Dios para Israel
136
Xmakakan ueyi tlaxtlauijli toTEKO,pampa yejua sanoyej kuajli iyojlo,
pampa itetlajsojtlalis xkaman tlami.
2 Xmakakan tlaxtlauijli on Dios
yejuan ueyixtikaj impan on xmelauak dioses,
pampa itetlajsojtlalis xkaman tlami.
3 Xmakakan ueyi tlaxtlauijli toTEKO
yejuan más ueyixtikaj impan on tetekouan,
pampa itetlajsojtlalis xkaman tlami.
4 Xmakakan ueyi tlaxtlauijli
on yejuan san yejua kichiua tlatlachalistin,
pampa itetlajsojtlalis xkaman tlami.
5 Xmakakan ueyi tlaxtlauijli
on yejuan okinchijchiu on cielos ikan miyek tlamatkilistli,
pampa itetlajsojtlalis xkaman tlami.
6 Xmakakan ueyi tlaxtlauijli
on yejuan okitlalij in tlajli ipan mar,
pampa itetlajsojtlalis xkaman tlami.
7 Xmakakan ueyi tlaxtlauijli
on yejuan okichijchiu tonaltsintli niman metstli,
pampa itetlajsojtlalis xkaman tlami:
8 on tonaltsintli para tlauiloua ipan tonajli,
pampa itetlajsojtlalis xkaman tlami;
9 on metstli niman on sitlalimej
para tlauilouaj ijkuak tlayoua,
pampa itetlajsojtlalis xkaman tlami.
10 Xmakakan ueyi tlaxtlauijli
on yejuan okinmiktij on tlakayenkuiyomej egipcios,
pampa itetlajsojtlalis xkaman tlami.
11 Xmakakan ueyi tlaxtlauijli
on yejuan okinkixtij on israelitas de Egipto,
pampa itetlajsojtlalis xkaman tlami.
12 Yejua, ikan iueyipoder okinkixtij,
pampa itetlajsojtlalis xkaman tlami.
13 Xmakakan ueyi tlaxtlauijli
on yejuan okitlajkoxeloj on Mar Rojo,
pampa itetlajsojtlalis xkaman tlami.
14 Niman itlajkotian on mar,
okimpanoltij on israelitas,
pampa itetlajsojtlalis xkaman tlami.
15 Pero yejua okamimiktij on rey de Egipto
iuan isoldados ipan on Mar Rojo,
pampa itetlajsojtlalis xkaman tlami.
16 Xmakakan ueyi tlaxtlauijli on yejuan okinyekan itlapejpeniluan
ipan on xalpatlajkan,
pampa itetlajsojtlalis xkaman tlami.
17 Xmakakan ueyi tlaxtlauijli on yejuan okinuijsok niman okintlan
on uejueyixtikatkaj reyes,
pampa itetlajsojtlalis xkaman tlami.
18 Yejua okinmiktij on reyes
yejuan kipiyayaj poder,
pampa itetlajsojtlalis xkaman tlami.
19 Okimiktij Sehón, rey amorreo,
pampa itetlajsojtlalis xkaman tlami.
20 Niman no okimiktij Og, rey de Basán,
pampa itetlajsojtlalis xkaman tlami.
21 Niman yejua okiminmakak on israelitas, ikoneuan,
ken herencia imintlaluan on reyes,
pampa itetlajsojtlalis xkaman tlami.
22 On herencia okiminmakak on israelitas,
itekipanojkauan,
pampa itetlajsojtlalis xkaman tlami.
23 Yejua otechelnamik ijkuak xok tikojtikej katkaj,
pampa itetlajsojtlalis xkaman tlami.
24 Yejua techmanauiya intech totlauelikniuan,
pampa itetlajsojtlalis xkaman tlami.
25 Yejua kimaka tlakuajli nochi tlen yoltikaj,
pampa itetlajsojtlalis xkaman tlami.
26 ¡Xmakakan ueyi tlaxtlauijli on Dios iluikakchanej,
pampa itetlajsojtlalis xkaman tlami!