On uejueyi tlajtlamach tlen okichiu Dios
135
¡Xyekteneuakan toTEKO!¡Xyekteneuakan itokatsin toTEKO!
¡Xyekteneuakan nemejuamej itekitkauan,
2 yejuan kitekipanouaj toTEKO ipan itiopan
yejuan kitekipanouaj toDios ikiauak itiopan.
3 Xyekteneuakan toTEKO pampa yejua kuajli nouika.
Xmokuikatikan kuikatl de yekteneualistli ipampa Dios,
pampa yejua kuajli iyojlo.
4 Tej, okitlapejpenij Jacob niman on israelitas
ken sen tesoro.
5 Nejua kuajli nikmatstikaj ika toTEKO ueyixtikaj.
Yejua más ueyixtikaj
xken nochimej on yejuan kinkuitiaj dioses.
6 Nochi on tlen toTEKO kineki,
kichiua ipan cielo, ipan tlaltikpaktli, ipan mar,
niman ne kampa más uejkatlan.
7 Kuiteua on moxtli nochiuiyan ipan in tlaltikpaktli,
kichiua ma onya on tlapetlanajli yejuan kiteititia ika kiauis,
niman ne kampa onkaj on miyek ajakatl, kixtia.
8 Yejua okinmiktij inyenkuiyokoneuan on egipcios
desde on tlakamej hasta on yolkamej.
9 Yejua okichiu tlamauisoltin
niman temojtij tetlatlachalistli ne Egipto
para okicastigaro on rey niman itekitkauan.
10 Okimpopoloj miyekej naciones,
niman okinmiktij reyes yejuan uejueyixtikaktaj:
11 Sehón, iminrey on amorreos, Og, rey de Basán,
niman nochimej on reyes de Canaán.
12 Niman intlaluan on reyes,
okinmakak ken herencia on israelitas
yejuan itlapejpeniluan toTEKO.
13 NoTEKO, motokatsin para yeyika onkaj;
nochipa mitselnamikiskej.
14 ToTEKO kinmanauiya itlapejpeniluan ken kitocaroua;
kinmiknelia itekitkauan.
15 Iminídolos on tlakamej tlachijchijtin ikan oro niman plata
yejuan on tlakamej kinmachijchiuaj.
16 Kipiyaj inkamak, pero xuelij tlajtlatouaj;
kipiyaj inmixtololojuan, pero xuelij tlachaj.
17 Kipiyaj iminnakas, pero xtlakakij,
nion xkipiyaj nemilistli.
18 On yejuan kinchijchiuaj
niman on yejuan kinneltokaj
no ijkej kenon ídolos.
19 Israelitas, xtiochiuakan toTEKO;
tiopixkej, xtiochiuakan toTEKO.
20 Levitas, xtiochiuakan toTEKO;
nemejuamej yejuan nenkitlakaitaj toTEKO, xtiochiuakan.
21 ¡ToTEKO yejuan chanti ne Jerusalén
ma kiseli tlatiochiualistli ne Sión!
¡Xkueyilikan toTEKO!