Yekteneualistli para ileyes Dios
119
Melauak kipiyaj paktli on yejuan kuajli nouikaj,niman kitlakamatij ileyes toTEKO.
2 Melauak kipiyaj paktli on yejuan kichiuaj on itlanauatiluan,
niman kitejtemouaj toTEKO ikan nochi iminyojlo.
3 Yejuamej xkichiuaj on tlen xkuajli,
on yejuan yauij ipan iojui toTEKO.
4 Tejua noTEKO, otitlanauatij
para ma kintlakamatikan motlanauatiluan,
niman ma kinmejeuakan kuajli.
5 ¡Ojalá nochipa ma ninemi yolmelajki
para nikintlakamatis motlanauatiluan!
6 Ijkon xitlaj ika nipinauas
tla nikintlakamatis nochi motlanaualiluan.
7 Nimitsyekteneuas ika nochi noyojlo
ijkuak nikajsikamatis momelajkaleyes.
8 ¡Nikneki nikchiuas motlanauatiluan!
¡Maka kaman tinechkauas!
9 ¿Tlinon ika kichipauas inemilis sen telpochtli?
San ikan motlajtoltsin tla kejeuas ipan iyojlo.
10 Nejua nimitstejtemoua ika nochi noyojlo.
Xnechpaleui
para maka kaman nikintlalkauis motlanauatiluan.
11 Yonikejeu motlajtoltsin ipan noyojlo
para maka nitlajtlakos motech.
12 ¡Nimitsueyiteneua noTEKO!
¡Xnechmachti motlanauatiluan!
13 Ika nokamak nochipa nikijtoua
nochi motlanauatiluan yejuan otitechijlij.
14 Más nipaki ika on motlanauatiluan
xken ika on miyek riquezas.
15 Kuajli niknemilis de motlanauatiluan
niman nikchiuas kanika
para kuajli ninouikas ipan moojui.
16 Ninopaktis ikan motlanauatiluan
niman xnikelkauas motlajtoltsin.
17 Xnechchiuili tlen kuajli nejua nimotekitkau
para ma ninemi niman ma niktlakamati motlajtol.
18 Xnechpaleui ma nikita,
para uelis nikitas on tlen kualtetsin kijtoua motemachtil.
19 Nejua xnichanej ipan in tlaltikpaktli,
Yejua ika, maka xnechiyanili motlanauatiluan.
20 Nejua xkaman noyolika ninemi
pampa sanoyej nikneki nikixmatis motlanauatiluan.
21 Tejua tikinmajua on yejuan noueyimatij,
on yejuan tlaueliltin,
pampa kitlalkauiyaj motlanauatiluan.
22 Xnechejkuanili on tlen xkuajli nechijtouilia,
niman ika nechchichiuaj,
pampa nejua nikejeua motlanauatiluan.
23 Maski on tlakamej uejueyixtokej nechtlajtouiliaj
ika itlaj xkuajli nechchiuiliskej,
nejua akin nimotekipanojkau, san nitlanemilia ipan motlanauatiluan.
24 Nejua nechyolpaktia on tlen titlanauatia;
yejua nechyekana.
25 Nisiu para nimikis;
¡xnechmaka nemilistli ijkon ken otikprometeroj!
26 Yoniknokuitij nochi tlen onikchiu,
niman tejua otinechnankijlij.
¡Aman xnechititi motlanauatiluan!
27 Xnechmaka kajsikamatilistli
para niuelis nikintlakamatis motlanauatiluan,
niman niknemilis nochi on tlen kualtsin tikchiua.
28 Noalma sanoyej najmana.
Yejua ika, xnechyolchikaua ijkon ken otikprometeroj.
29 Xnechejkuani itech on ojtli de tlakajkayaualistli.
Niman ikan moteiknelilis
xnechpaleui ma niueli nikajsikamati on ley.
30 Yoniktlapejpenij on yejuan melauak ojtli,
niman nikneki motlanauatiluan.
31 NoTEKO, nejua yonikintlakamat motlanauatiluan.
Maka tikauilis yakaj nechpinajtis.
32 Ikan nochi noyojlo nikintlakamatis motlanauatiluan,
pampa otinechpaleuij para nikinkajsikamati.
33 NoTEKO,
xnechititi kenijki niuelis nikintlakamatis motlanauatiluan.
Nikneki nikintlakamatis ipan nochi nonemilis.
34 Xnechpaleui ma nikajsikamati motemachtil,
niman ika nochi noyojlo niktlamakatis.
35 Xnechyekana ipan on ojtli
para uelis nikatlakamatis motlanauatiluan
pampa ipan motlanauatiluan nikpiya pakilistli.
36 Xchiua para noyojlo maka keleuis on xchipauak tomin,
yej para ma kintlajsojtla motlanauatiluan.
37 Maka xnechkauili niktlalis noyojlo
intech on xmelauak dioses.
¡Xnechmaka nemilistli para niktokas moojui!
38 Melauak xchiua on promesa
yejuan otikijtoj tikmakas in motekitkau,
on promesa yejuan tikinmaka on yejuan mitstlakaitaj.
39 Xnechejkuanili on pinaualistli yejuan nikmakajsi.
Tej, on motlanauatiluan melauak kuajkualtin.
40 Nejua nikinneki motlanauatiluan.
Xnechmaka nemilistli pampa tejua tiyolmelajki.
41 NoTEKO, xnechititi motetlajsojtlalis
niman motemakixtilis,
ijkon ken otinechprometerouilij.
42 Ijki tej, niuelis nikinnankilis
on yejuan kinekij nechpinajtiskej,
pampa nikneltoka motlajtol.
43 Xnechpaleui para nochipa nikijtos motlajtol yejuan melauak,
pampa niktlalia nochi notlamachalis ipan motlanauatiliuan.
44 Nikneki nochipa niktlakamatis motemachtil.
Nochipa, niman para nochipa niktlakamatis.
45 Ijkon kemaj uelis ninemis noyolika,
pampa nikintlakamati motlanatiluan.
46 Nikteijlis motlanauatiluan imixpan on reyes
niman xnipinauas.
47 Tej, nikintlajsojtla motlanauatiluan
niman nechpaktiaj.
48 Nikintlakaita niman nikintlajsojtla motlanauatiluan,
niman nochipa ninonemilis ipan motlanauatiluan.
49 Xkelnamiki mopromesa yejuan otikijlij in motekitkau;
yejua nechpaleuiya para niueli nitlamacha.
50 Yejua nechyoltlalia ijkuak nitlajyouiya,
niman mopromesas nechyoleuaj ipan nonemilis.
51 On noueyimatkej san ika nokauaj nechpajsolouaj,
pero nejua xniktlalkauiya motemachtiluan.
52 NoTEKO, nejua nikelnamiki motlanauatiluan
yejuan yeuejkaui otiktlalij,
niman yejua ika ninoyoltlaliaj.
53 Nechkualaniaj on xompayejyeuamej
yejuan kitlalkauiyaj motemachtil.
54 On moleyes yejuamej nochiuaj nokuikauan
ipan in tlajli kampa xnichanej.
55 NoTEKO, ijkuak tlayoua nimitselnamiki.
¡Nikneki nikchiuas on tlen kijtoua motemachtil!
56 In yejua nechtocaroua nikchiuas:
ma nikejeua on tlen titlanauatia.
57 Tejua noTEKO, san tejua nimitspiya;
yejua ika, nikprometeroua nikchiuas tlinon tikijtoua.
58 Ikan nochi noyojlo nikchiua kanika para nimitspaktis;
xnechchiuili tlen kuajli ken tejua yotikijtoj ipan mopromesa.
59 Nejua onikixtlaloj ika xkuajli ken ninouika,
niman oksejpa opeu nikintlakamati motlanauatiluan.
60 Nejua xoninouejkau,
yej, nimantsin opeu nikchiua ken kijtouaj motlanauatiluan.
61 Maski miyekej on xkuajkuaktin tlakamej
kinekij nechtlajkaliskej ipan tlajtlakojli,
nejua xnikelkaua on tlen otinechmachtij.
62 Tlajkoiuan ninokuiteua
para nimitsmaka tlaxtlauijli
pampa motlanauatiluan melajkej.
63 Nejua iminuan ninouika on yejuan mitstlakaitaj
niman kitlakamatij on tlen titlanauatia.
64 NoTEKO, nochi tlaltikpaktli tentikaj
ikan motetlajsojtlalis yejuan xkaman tlamis.
¡Xnechinmachti motlanauatiluan!
65 NoTEKO, tejua nochipa tinechchiuilia
tlen kuajli nejua nimotekitkau,
ijki ken otinechjlij tikchiuas.
66 Xnechpaleui ma nikpiya tlamatkilistli
niman kuajli tlamachilistli,
pampa nejua yoniktlalij nochi noyojlo itech motlanauatiluan.
67 Ijkuak xe tinechtlajyouiltiaya,
tlamach onikchiu tlen xkuajli,
pero aman niktlamati motlajtoltsin.
68 Tejua tikuajli, niman tikchiua nochi tlen kuajli.
¡Xnechmachti motlanauatiluan!
69 On yejuan noueyimatij nechtlajtolketsteuiliaj,
pero nejua nikintlakamati motlanauatiluan ikan nochi noyojlo.
70 On yejuan noueyimatij yotlamachilispolijkej,
pero nejua nikuelita motemachtil.
71 Nikita kuajli ika otinechtlajyouiltij,
pampa ijki oniuel oniktlakamati moleyes.
72 Para nejua,
más ueyi kijtosneki on tlen ika mokamaktsin tinechmachtia,
xken on miles de tepostomin
yejuan de plata noso de oro.
73 Tejua ika momatsin otinechchijchiu niman oninochiu.
¡Xnechmaka tlamachilistli
para niuelis niktlakamatis motlanauatiluan!
74 Yejuan mitstlakaitaj sanoyej pakij ijkuak nechitaj,
pampa yoniktlalij notlamachalis ipan motlajtoltsin.
75 NoTEKO,
nejua nikmatsitikaj ika on tlen titlanauatia nochi melajki,
niman ijkuak tinechtlajyouiltia kuajli tlen tikchiua.
76 ¡Ma motetlajsojtlalis yejuan xkaman tlamis nechyoltlali,
ijkon ken otinechprometerouilij tikchiuas nejua nimotekitkau!
77 Xnechmaka moueyiteiknelilis para ma ninemi,
pampa nikmati miyek paktli ikan on motemachtil.
78 Tejua xkimpinajti on yejuan noueyimatij
niman nechtlajyouiltiaj maski xitlaj nikinchiuilia.
Pero nejua ninonemilis ipan motlanauatiluan.
79 Ma nosentlalikan nouan on yejuan mitstlakaitaj,
yejuan kixmatij on tlen titlanauatia.
80 Xnechpaleui
para ipan noyojlo nochi kuajli ma onya ipan motlanauatiluan,
para maka itlaj ika nipinauas.
81 Sanoyej nikneki para xnechmakixti;
nochi notlamachalis yoniktlalij ipan motlajtoltsin.
82 Nixtololojuan hasta xok uelij tlachaj
sa kichixtokej kamanon ticumpliros mopromesa.
Niman ijkin nikijtoua:
"¿Hasta kamanon tinechajyoltlalis? "
83 Maski ye niueuentsin niman xok ueli itlaj nikchiua
hasta yoninokau ken itlaj kuetlaxxikipijli yejuan yopocheu,
nejua xkaman nikelkaua moleyes.
84 ¿Hasta kamanon más nitlamachas?
¿Yej, kamanon tikinyolkuitis on yejuan nechtotokatinemij?
85 On yejuan noueyimatij,
yejuan xnouikaj ipan moleyes
nechtlatlaliliaj ipan nonemilis.
86 ¡Yejua ika xnechpaleui,
pampa xonkaj tline kinekij nechtlaueltotokatinemij!
¡Nochi motlanauatiluan sanoyej melauak!
87 Sa achijtsin opoliuito ye nechpopoloskiaj,
pero nejua xnikaua ika nikchiua tlen titlanauatia.
88 Xkejeua nonemilis
pampa sanoyej ueyi motetlajsojtlalis yejuan xkaman tlamis,
niman nikchiuas nochi tlen tejua tikijtoua.
89 NoTEKO, motlajtoltsin onkaj para nochipa.
¡Kuajli yejyejtikaj ne iluikak!
90 Nochi tlen tikijtoua tikchiuas,
nochipa melauak tikchiua.
On tlaltikpaktli kuajli otiktlalij
niman ijki ken otiktlalij, hasta aman ijki onkaj.
91 Nochi on tlajtlamach saken ijki onkaj ken tejua otitlanauatij,
pampa nochi on tlajtlamach kichiuaj motekiu.
92 Tla motlanauatiluan xnechmakaskiaj pakilistli,
on tlajyouilistli nechmiktiskia.
93 Xkaman nikelkauas motlanauatiluan,
pampa yejua ika otikejeu nonemilis.
94 ¡Xnechmakisti pampa nejua nimoyaxka,
niman nochipa niktlakamati motlanauatiluan!
95 On xompayejyeuamej sa kichixtokej
kamanon nechmiktiskej,
pero nejua nitlamacha ipan motlanauatiluan.
96 Nejua yonikitak ika nochi on tlajtlamach tlen sanoyej kuajli no san panoua,
pero motlanauatiluan xkaman san panos.
97 ¡Ay, noTEKO, nejua sanoyej niktlajsojtla moley!
¡Nochi tonajli ninonemilia ipan moley!
98 Motlanauatiluan nejua nochipa nikimpiya,
niman yejuamej nechmakaj más tlamatkilistli
xken notlauelikniuan.
99 Nikajsikamati más xken nochimej notemachtijkauan
pampa sanoyej ninonemilia ipan motlanauatiluan.
100 Nejua más nitlakajsikamati xken on ueuentsitsimej,
pampa nikintlakamati motlanauatiluan.
101 Yoniktlalkaui nochi tlen xkuajli
para niktlakamati motlajtoltsin.
102 Xnikintlalkauiya motlanauatiluan
pampa tejua kuajli tinechititia.
103 Nokamak nikmati más tsopelik motlajtoltsin
xken on nekutli.
104 Ipampa motlanauatiluan nikselia tlamatkilistli.
Yejua ika, xnikuelita ika on tlakamej kichiuaj tlen xkuajli.
105 Motlajtoltsin yejua tlauijli yejuan nechyekana
niman nechtlauiluiya ipan noojui.
106 Oninotlajtolmakak ixpan Dios
niman ika onkaj nikchiuas
para nikintlakamatis moyektlanauatiluan.
107 NoTEKO, sanoyej yonitlajyouij.
Tejua xkejeua nonemililis,
ijkon ken otikprometeroj ipan motlajtoltsin.
108 NoTEKO, xseli noueyikatsajtsilis de tlaxtlauijli
ken sen uentli,
niman xnechinmachti motlanauatiluan.
109 Nejua nochipa nechmiktisnekij
pero nejua xnikelkaua motemachtiluan.
110 On xkuajkualtin tlakamej okintlalijkej tlatlaliltin
para niuetsis,
pero nejua xniktlalkauiya motlanauatiluan.
111 Motlanauatiluan yejua noherencia para nochipa
pampa yejua nechyolpaktia.
112 Ikan nochi noyojlo yonikijtoj
para nikintlamatis motlanauatiluan
desde aman hasta kaman nimikis.
113 Xnikinmineki on tlakamej yejuan omexakyejkej,
pero nejua sanoyej niktlajsojtla moley.
114 Tejua sanoyej kuajli tinechmanauiya ken itlaj escudo.
Ipan motlajtoltsin yoniktlalij nochi notlamachalis.
115 Xnechtlalkauikan xompayejyeuamej,
pampa nejua nikneki nicumpliros itlanauatiluan noDios.
116 Xnechmaka chikaualistli,
ken tejua yotinechprometerouilij,
niman ijki kuajli ninemis.
Maka tinechkauilis nikpolos notlamachalis.
117 Xnechpaleui niman xitlaj nopan nochiuas,
niman nochipa nikintlamatis moleyes.
118 Tejua tikinchichiua yejuan kitlalkauiyaj moleyes,
pampa intlamachilis para tejua xitlaj kijtosneki.
119 On xkuajkualtin tlakamej para tejua ken itlaj tlajsojli,
yejua ika nejua nikintlasojtla motlanauatiuantiluan.
120 Nochi notlalnakayo kuekuetlaka
pampa mixpan ninomojtia;
tejmotij nikintlakaita motlanauatiluan.
121 Nejua nochipa nikchiua on tlen kuajli niman melajki;
maka xnechtekauili ipan inmauan notlauelikniuan.
122 Nopan xtlacha nejua motekitkau, xnechmaka nochi tlen kuajli;
maka ma noka nauiltikan on xompayejyeuamej.
123 Nixtololojuan hasta xok uelij tlachaj
sa kichixtokej motemakixtilis,
no sa kichixtokej para xnechmanaui ijkon ken yotikprometeroj.
124 NoTEKO, nopan xtlacha nejua motekitkau
niman xnechtlajsojkaita
ikan on motetlajsojtlalis yejuan xkaman tlamis.
¡Xnechmachti más de moleyes!
125 Nejua nimotekitkau, nikneki nikixmatis
niman más nikajsikamatis motlanauatiluan.
126 NoTEKO, ye noneki para itlaj tikchiuas,
pampa xakaj kineki kitlakamatis moleyes.
127 Nejua más nikintlajsojtla motlanauatiluan,
xken itlaj oro yejuan más fino.
128 Yejua ika, nejua ipan ninoyekana on tlen titlanauatia,
niman niktlauelita nochi xompayejyeualistli.
129 Motlanauatiluan sanoyej nechpakatlatlachaltiaj;
yejua ika nikintlakamati.
130 Ijkuak motlajtoltsin kitetlajtlajtouiliaj
xikan uejueyi tlajtojli,
kitemaka tlamachilistli,
hasta on yejua xitlaj kimatij uelij kajsikamatij.
131 Ken sen yolki kineki atl ijkuak sanoyej amiki,
nejua más nikneki nikmatis tlinon kijtouaj motlanauatiluan.
132 NoTEKO, nopan xuajtlacha niman xnechikneli,
ijkon ken tejua tikchiua inuan on yejuan mitstlajsojtlaj.
133 Tejua xnechyekana ijkon ken kijtoua motlajtoltsin;
maka tikauilis nechtlanis on tlajtlakojli.
134 Xnechmanaui de on tlen xkuajli nechchiuilisnekij
on xkuajkualtin tlakamej,
pampa nejua nikneki nikchiuas on tlen titlanauatia.
135 NoTEKO, xkita ikan pakilistli in motekitkau,
niman xnechmachti moleyes.
136 Nixayo toyaui sanoyej miyek ken itlaj ueyi atl
pampa xkitlakamatij moleyes.
137 NoTEKO, tejua tiyolmelajki;
melajkej nochi motlanauatiluan.
138 Nochi motlanauatiluan sanoyej melajkej
niman kuajli para tiktlaliskej nochi toyojlo yejua ipan.
139 Sanoyej nechtlauelmiktia,
pampa notlauelikniuan kitlaluelmati motlajtoltsin.
140 Nochi mopromesas yonikitak ika melakak nochiua;
yejua ika, nejua motekitkau niktlajsojtla.
141 Nejua nechiknoitaj niman nechchichiuaj,
pero xkaman nikelkaua on tlen titlanauatia.
142 Tejua nochipa tikchiua tlen melajki,
niman moley sanoyej melajki.
143 Nikpiya miyek tlajyouilistli niman ajmantli,
pero motlanauatiluan onechmakak pakilistli.
144 Motlanauatiluan nochipa melajkej;
xnechmaka kajsikamatilistli
para nikmatis kenijki kuajli ninemis.
145 NoTEKO, nimitsnotsa ikan nochi noyojlo,
¡Xnechnankili pampa nejua nikneki nikintlakamatis moleyes!
146 Nejua nimitstsajtsilia;
xnechmakixti, niman nikintlakamatis motlanauatiluan.
147 Ijkuak xe tlanesi, ninokuiteua,
niman nimitstlajtlanilia para xnechpaleui.
Nitlamacha ipan mopromesa.
148 Nochi tlayoua, nixtololojuan xkaman notsakuaj,
niman ninonemilia ipan mopromesa.
149 NoTEKO, xnechkaki ika moueyi tetlajsojtlalis;
Pampa tiyolmelajki, xkejeua nonemililis.
150 Nemij nisiu on yejuan nechtlaueltotokatinemij,
pero yejuamej nemij uejka de motemachtiluan.
151 NoTEKO tejua tinemi nisiu,
niman nochi motlanauatiluan tlen melauak.
152 Desde yeuejkaui nikajsikamati
ika otiktlalij motlanauatiluan para xkaman tlamis.
153 Xkita ika nitlajyouiya, niman xnechmakixti,
pampa nejua xnikelkaua motemachtiluan.
154 Tejua nopan xtlacha, niman xnechmanaui;
xkejeua nonemilis ken otinechprometerouilij ipan motlajtol.
155 Motemakixtilis uejka onkaj de on xkuajkualtin tlakamej,
pampa xkintlakamatij motlanauatiluan.
156 NoTEKO, sanoyej ueyi moteiknelilis.
Pampa tiyolmelajki, xkejeua nonemilis.
157 Nemij miyekej notlauelikniuan
niman on yejuan nechtlaueltotokatinemij,
pero nejua xnikintlalkauiya motlanauatiluan.
158 Nechkualaniaj on yejuan nikita mitstlakauiyaj,
pampa xkintlakamatij motlanauatiluan.
159 NoTEKO,
xkita ika melauak nikintlajsojtla motlanauatiluan.
Pampa ueyi motetlajsojtlalis, xkejeua nonemilis.
160 Nochi motlajtoltsin yejua tlen melauak;
nochi motlanauatiluan melajkej niman para nochipa onyaskej.
161 On tlakamej uejueyixtokej nechtotokatinemij
maski xtlaj nikinchiuilia,
pero ikan noyojlo niktlakaita motlajtoltsin.
162 Nejua nipaki ika on mopromesa,
ken yajkaj yejuan kinextia sen ueyi tesoro.
163 Nejua nechkualania nochi tlakajkayaualistli;
xniueli nikxikoua tla sekimej kichiuaj.
Pero niktlajsojtla motemachtil.
164 Chikomepa ipan se tonajli nimitsueyilia
ipampa motlanauatiluan tlen melajkej.
165 Yejuan melauak kitlajsojtlaj moleyes,
kipiyaj yolseuilistli,
niman xitlaj ika uetsij ipan on tlen xkuajli.
166 NoTEKO, nikchixtikaj para tinechmakixtis,
pampa nejua nikchiua kanika
para nikchiuas nochi tlen titlanauatia.
167 Nejua nikintlakamati motlanauatiluan,
niman sanoyej nikintlajsojtla ikan nochi noyojlo.
168 Nejua nikintlakamati motlanauatiluan
niman nochi tlen tikijtoua.tikmatstikaj nochi ken ninouika ipan nonemilis.
169 NoTEKO, xkaki tlinon chikauak nimitstlajtlanilia,
xnechmaka kajsikamatilistli ken tejua yotikijtoj.
170 Xseli noueyikatsajtsilis;
xnechmanaui ijki ken yotikprometeroj.
171 Nejua ninotenkixtis ikan ueyiteneualistli,
pampa tejua yotinechmachtij moleyes.
172 Nikneki ikan nokamak ninokuikatis
sen kuikatl de mopromesa,
pampa nochi motlanauatiluan melajkej.
173 Sa xpixtia momatsin para tinechpaleuis,
pampa nejua onikintlapejpenij nikintlakamatis motlanauatiluan.
174 NoTEKO, ¡nikneki xnechmanaui!
¡Nejua nikuelita on tlen tinechmachtia!
175 Nejua nikneki ninemis para nimitsueyiteneuas;
on momelajkatlajtoltsin ma nechpaleui.
176 Nejua oninopojpoloj ken sen borreguito.
¡Xuajla, xnechtejtemoki,
pampa nejua xkaman nikinmelkaua motlanauatiluan!