Ueyikatsajtsilistli de tlaxtlauijli ipampa temakixtilistli
118
Xmakakan tlaxtlauijli toTEKOpampa yejua sanoyej kuajli iyojlo,
niman itetlajsojtlalis xkaman tlami.
2 Ma kijtokan on hebreos:
"Itetlajsojtlalis toTEKO xkaman tlami."
3 Ma kijtokan on tiopixkej:
"Itetlajsojtlalis toTEKO xkaman tlami."
4 Ma kijtokan on yejuan kitlakaitaj toTEKO:
"Itetlajsojtlalis toTEKO xkaman tlami."
5 Ijkuak ninajmanaya, oniknots toTEKO;
yejua onechkak niman onechmanauij.
6 ToTEKO nouan nemi.
Yejua ika xninomojtia.
¿Tlinon uelis nechiuilis yakaj tlakatl?
7 ToTEKO nouan nemi, niman yejua nechpaleuis.
¡Nikitas ken kintlaniskej on yejuan nechtlauelitaj!
8 Más kuajli niktlalis nochi noyojlo itech noTEKO,
xken tla niktlalis nochi noyojlo itech sen tlakatl.
9 Más kuajli niktlalis nochi noyojlo itech noTEKO,
xken tla niktlalis nochi noyojlo intech on uejueyixtokej tlakamej.
10 Nochi naciones onechyejyeualojkej,
pero ikan ipoder toTEKO onikintlan.
11 Onechyejyeualojkej nochiuiyan,
pero ika ipoder toTEKO onikintlan.
12 Onechyejyeualojkej ken itlaj chilpanmej,
pero imintsojtsopinalis nimantsin opopoliu
kenon uitstli ijkuak yotlatlak.
¡Ika ipoder toTEKO onikintlan!
13 Sanoyej onechuijsokkej niman ye nechtlantikatkaj
pero toTEKO onechpaleuiko.
14 Nejua ninokuikatia itech toTEKO,
yejuan nechmaka poder.
¡Yejua noTemakixtijkau!
15 Inchan on tlakamej yejuan yolchipajkej
kinokuikatiaj in kuikatl de tetlanilistli:
"Iueyilis toTEKO otetlan.
16 Ipoder toTEKO sanoyej ouel tetlani.
¡Iueyilis toTEKO otetlan!"
17 ¡Nejua xnimikis,
yej ninemis para niktetlajtlajtouilis on tlen toTEKO okichiu!
18 ToTEKO onechcastigaroj chikauak,
pero xonechkauilij ma nimiki.
19 ¡Xkintlapokan iueyitsakuijlou on ueyitiopan,
pampa nikneki nikalakis
para nikmakas tlaxtlauijli toTEKO!
20 In tsakuijlotl yejua teuika ixpan toTEKO,
niman in yejua ipan kalakiskej on yolchipajkej.
21 Nimitsmaka tlaxtlauijli noTEKO,
pampa yotinechnankilij
niman pampa tejua otinechmakixtij.
22 On tetl yejuan on tepanchijchijkej xokiselijkej,
aman yejua yonotlalij yakatstikaj.
23 In okichiu toTEKO,
niman sanoyej kualtsin on tlen okichiu.
24 In yejua on tonajli yejuan okitlalij toTEKO;
ma tipakikan ipan in tonajli.
25 Ay toTEKO, xtechmakixti!
Ay toTEKO, xtechpaleui para nochipa titetlaniskej.
26 ¡Ma Dios kitiochiua on yejuan uajlau
ikan itokatsin toTEKO!
Temechtiochiuaj desde nikan ipan iueyitiopan toTEKO.
27 ToTEKO yejua Dios.
¡Yejua totlauil!
Ma peua on iluitl,
niman xkiktikan kuamatli selik
hasta itech ikuakuautsitsiuan on tlaixpan.
28 ¡Nimitsmaka tlaxtlauijli niman nikyekteneua moueyilis,
pampa tejua tinoDios!
29 Xmakakan tlaxtlauijli toTEKO pampa yejua kuajli,
niman itetlajsojtlalis xkaman tlami.