ToDios nemi ne iluikak
115
ToTEKO, maka tejuamej ma tikselikan ueyilistli, yej tejua xseli on ueyilistli.
Melauak tej, san tejua xseli on ueyilistli
pampa moueyitetlajsojtlalis*
yejuan xkaman tlamis xkaman nopatla,
niman ika nochipa tikchiua on tlen tikprometeroua.
2 ¿Man tline techtlajtoltiaj on yejuan xtlaneltokaj:
"¿Kanon nemi nemoDios?”
3 ToDios nemi ne iluikak,
niman nochi tlen yejua kineki, kichiua.
4 Iminídolos on xtlaneltokakej
san tlachijchijtin ikan plata niman oro,
niman san kinmachijchiuaj on tlakamej.
5 Kipiyaj inkamak, pero xuelij tlajtouaj.
Kipiyaj inixtololojuan, pero xuelij tlachaj.
6 Kipiyaj innakasuan, pero xuelij tlakakij.
Kipiyaj iminyak, pero xuelij tlajnekuij.
7 Kipiyaj inmauan, pero xuelij tlakiktsiaj.
Kipiyaj inmikxiuan, pero xuelij nennemij,
nion xuelij tlajtlatouaj.
8 On yejuan kinchijchiuaj on ídolos,
niman on yejuan intech tlaneltokaj,
no ijkej kenon iminídolos.
9 Pero nemejuamej chanejkej ne Israel,
xtlalikan nemoyojlo itech toTEKO.
Yejua mechpaleuiya niman mechmanauiya.
10 Niman nemejuamej tiopixkej,
xtlalikan nemoyojlo itech toTEKO.
Yejua mechpaleuiya niman mechmanauiya.
11 Nemejuamej yejuan nenkitlakaitaj toTEKO,
xtlalikan nemoyojlo yejua itech.
Yejua mechpaleuiya niman mechmanauiya.
12 ToTEKO yotechelnamiki niman yejua techtiochiuas.
Kintiochiuas on chanejkej Israel
niman kintiochiuas imintiopixkauan.
13 Kintiochiuas nochimej on yejuan kitlakaitaj,
saken on uejueyixtokej
niman on yejuan xuejueyixtokej.
14 Ma toTEKO mechmaka miyek nemokoneuan,
niman ma kinmaka nemokoneuan miyek inkoneuan.
15 ToTEKO, yejuan okitlalij iluikakyotl niman tlaltikpaktli,
ma mechmaka itlatiochiualis.
16 On iluikak iyaxka* toTEKO Dios.
Niman on tlaltikpaktli okinmaktilij on tlaltikpaktlakamej.
17 On yejuan yotemokej ijtik on tlalkontli
xok kimauistiliaj toTEKO.
Melauak tej, on mikatsitsimej xok uelij kimauistiliaj toTEKO.
18 Yej tejuamej tikmauistiliskej aman niman para nochipa.
¡Ma kiyekteneuakan toTEKO