On yejuan kitlakaita toTEKO kiselia miyek tlatiochiualistli
112
¡Ma tikyekteneuakan toTEKO! Sanoyej pakis on yejuan kitlakaita toTEKOniman ikan paktli kintlakamati itlanauatiluan.
2 Iuejkakoneuan on yejuan yolchipauak
kiseliskej miyek tlatiochiualistli,
niman iuejkakoneuan
sanoyej kipiyaskej poder ipan in tlajli.
3 Ipan ichan, onkaj miyek riquezas,
niman yejua xkaman kajkauas ika kichiuas tlen kuajli.
4 Onkaj sen tlauijli ne kampa tlayouatok,
para on kuajkualtin tlakamej,
para on yejuan teikneliani,
yolyemanki niman yolmelajki.
5 Kiselis on tlen kuajli on yejuan kuajli iyojlo,
kuelita tetlanejtia itlaj,
niman nochi itekiu kuajli kiyekana.
6 Yejua ika, yejua xkaman uetsis.
¡On yejuan yolmelajki, nochipa kelnamikiskej!
7 Yejua xnomojtia tla kijliaj itlaj xkuajli nochiuas,
pampa nochi iyojlo kitlalia itech toTEKO.
8 Yejua nochipa iyolika nemi. Xitlaj kimakajsi,
niman kintas ken uetsiskej itlauelikiniuan.
9 Yejua nochipa kimpaleuiya yejuan mayankej;
xkaman kajkaua ika kichiua tlen kuajli.
Yejua kipiyas tetlakaitalistli.
10 Ijkuak on xompayejyeuamej ijkon kitaj,
sanoyej kualanij, hasta notlantisij.
On tlen sanoyej kipiyasnekij on xompayejyeuamej,
xkaman kipiyaskej.