ToTEKO ye kuajli yotetlan
98
¡Xkuikatlalikan toTEKO ikan sen yenkuik kuikatl,pampa yejua yokichiu uejueyi tetlatlachalistin!
¡Ye kuajli yotetlan ikan iueyipoder, ikan iyekma!
2 ToTEKO yokijtoj ika yotetlan,
yokintitij on naciones iyolmelajkilis.
3 Yejua nochipa kintlajsojtla on israelitas
ikan sen tetlajsojtlalistli yejuan xkaman tlamis,
niman xkaman kinkaua.
¡Nochiuiyan hasta kampa ontlami in tlaltikpaktli,
nochi tlakatl yokitakej ika Dios yotetlan!
4 Xkuikatlalikan Dios ikan paktli,
nemochimej yejuan nenchanejkej ipan in tlaltikpaktli.
Sanoyej xpakikan, niman xkuikatlalikan.
5 Xkuikatlalikan toTEKO ika on tlatsotsonajli arpa,
ika on tlatsotsonajli arpa xmokuikatikan.
6 Xmokuikatikan ikan paktli ixpan toTEKO, yejuan toRey,
niman xkimpitsakan on tepostlapitsaltin
niman no xkimpitsakan inkuakuauuan borregos.
7 Ma kakisti ken paki on mar niman nochi tlen ijtik nemi,
ma paki in tlaltikpaktli niman nochimej on tlaltikpaktlakamej.
8 Ma nomatlaxkalokan on ríos,
niman on tepemej san sekan ma pakatsajtsikan
9 ixpan toTEKO,
yejuan ye uajlau uajtlamandaros ipan in tlaltikpatli.
Yejua tlamandaros impan nochimej on kalpanmej
de in tlaltikpak ikan yolmelajkilistli,
niman xakaj kichikoitas.