¡ToTEKO yejua Rey!
97
¡Xpakikan, nemochimej chanejkej ipan in tlaltikpaktli!¡Xpakikan, yejuan nenchanejkej impan on tlaluaktsitsimej!
¡ToTEKO yejua Rey!
2 Yejua nemi ijtik on tilauak moxtli.
Yejua tlamandaroua ikan on yolchipaualistli
niman ikan on yolmelajkilistli.
3 On tlitl yau iyakapan toTEKO,
niman kintlatia on itlauelikniuan yejuan iyeualkan nemij.
4 On tlapetlanajli yejuan kuajtitlani, kitlauiluiya in tlaltikpaktli,
¡niman in tlaltikpaktli uiuixka ijkuak kita ken tlapetlani!
5 On tepemej patij ken itlaj cera ixpan toTEKO,
ixpan on toTEKO yejuan iyaxka nochi in tlaltikpaktli.
6 On cielos kitemachistiaj iyolmelajkilis toTEKO;
nochimej on naciones kitaj iueyilis.
7 Nochimej on yejuan kinmauistiliaj ídolos
niman hasta inka noueyimatij, sanoyej nopinajtiaj.
¡Nochimej on dioses, notlakuantelketsaj ixpan toTEKO!
8 Ay toTEKO,
Jerusalén niman on uejueyikalpanmej de Judá,
sanoyej pakij ika on tlen titlanauatia.
9 Tejua toTEKO, yejuan sanoyej tiueyixtikaj,
tejua tikmandaroua nochi in tlaltikpaktli.
Tejua más tiueyixtikaj xken nochimej on dioses.
10 Nemejuamej yejuan nenkitlajsojtlaj toTEKO,
maka xnekikan on tlen xkuajli.
Yejua kinmejeua on yejuan yolchipajkej,
niman kinmanauiya de on xompayejyeuamej.
11 On tlauijli tlauiloua para on tlakatl yejuan kuajli iyojlo,
niman on paktli kipiyaj on yejuan kuajli nouikaj.
12 ¡Xpakikan itech toTEKO,
nemejuamej yejuan kuajli nemoyojlo,
niman xmauistilikan iyektokatsin!