Sen yenkuik kuikatl de yekteneualistli para toTEKO
96
Xkuikatlalikan toTEKO ikan sen yenkuik kuikatl;xkuikatlalikan toTEKO nemochimej
yejuan nenchanejkej ipan in tlaltikpaktli.
2 Xkuikatlalikan toTEKO niman xyekteneuakan,
mojmostla xteijlikan ken temakixtia.
3 Xtlajtlajtokan de iueyilis niman itlamauisoluan,
intech nochimej on tlakamej niman naciones,
4 pampa toTEKO ueyixtikaj
niman sanoyej kinamiki ma kiyekteneuakan,
niman más sanoyej temojtij ken nochimej on dioses.
5 On dioses de oksekimej naciones
san ídolos yejuan xitlaj* kijtosneki,
pero toTEKO okinchijchiu on cielos.
6 ¡Onkaj ueyi tlakaitalistli niman ueyilistli kampa yejua nemi!
¡Onkaj poder niman tlakualtsinkan ipan iyektiopan!
7 Xmakakan toTEKO yekteneualistli,
nochimej familias ipan nochi naciones.
Xyekteneuakan ipoder niman iueyilis toTEKO.
8 Xmakakan toTEKO on tlakaitalistli yejuan kimelaua;
ikan tlajtlamach uentli
xuiyan ixpan ipan on kiauak de iyektiopan.
9 Xmauistilikan toTEKO ipan on kualtsin iyektiopan.
¡Nochi tlakatl ipan in tlaltikpaktli ma kuekuetlaka ixpan yejua!
10 Xkimijlikan on naciones: "¡ToTEKO yejua rey!"
Yejua kuajli okitlalij in tlaltikpaktli para xkaman nejkuanis.
Ijkuak teyolkuitia, xtechikoita.
11 ¡Ma pakikan on cielos niman in tlaltikpaktli!
¡Ma kakisti chikauak on mar,
niman nochi on ayolkej yejuan nemij ipan,
sanoyej ma kiueyiteneuakan toTEKO!
12 ¡Ma paki on campo niman nochi yejuan onkaj ipan!
¡Ma tsajtsikan ikan pakilistli
nochimej on kojtin* ipan on kojyoj ixpan toTEKO,
13 ijkuak uajlas para kimandaros in tlaltikpaktli.
Uajlas ken tekiuaj para kiyolkuitis nochi tlakatl.
Teyolkuitis ikan yolmelajkilistli, niman ikan on tlen melauak.