Ma titokuikatikan ikan paktli para toTEKO
95
Xuajlakan, ma titokuikatikan ika paktli para toTEKO.Ma titokuikatikan para Dios
yejuan toTemanauijkau niman toTemakixtijkau.
2 Ma tiuajlakan itech, ikan tlajsojkamachilistli,
niman ma titokuikatikan kuikamej ika ueyiteneualistli,
3 pampa toTEKO yejua Dios yejuan sanoyej ueyixtikaj,
yejua más ueyixtikaj Rey de nochimej on dioses.
4 Yejua kimandaroua nochi in tlaltikpaktli
hasta kampa más tlatsintlan,
niman on más tlakpak tepemej.
5 No iyaxka on mar yejuan okichijchiu,
niman ika imauan okichijchiu in tlaluaktli.
6 Xuajlakan, ma titopachokan ixpan niman ma tikmauistilikan.
Ma titotlakuantelketzakan ixpan toTEKO
yejuan otechchijchiu,
7 pampa yejua toDios, niman tejuamej tiitlapejpeniluan.
Tejuamej ken tiiborrregos, niman yejua techtlajpiya.
Xkakikan aman on tlen yejua mechijlia:
8 Maka xmoyoltechikauakan ijkon
ken nemouejkatajuan okichijkej ne Meriba,
noso ijkuak nemiyaj ne Masah ipan on xalpatlajkan,
9 kampa onechtlatlatakej,
maski yokitakaj on tlajtlamach yejuan onikchiu.
10 Cuarenta xipan onikpix tlauejli iminuan on israelitas,
niman onikijtoj: "In istraelitas nochipa nechtlalkauiyaj.
Xkintlakamatij notlanauatiluan".
11 Yejua ika, nejua sanoyej onikualan,
niman oninotlajtolmakak
ika yejuamej xkalakiskej ipan on tlajli
kampa niknekiya nikinmakas neseuijli.