ToTEKO yejua Juez ipan nochi in tlaltikpaktli
94
¡Xtechnotiti toTEKO Dios, tejua yejuan titetlakuepiltia!2 Tejua titeyolkuitijketl de in tlaltikpaktli,
¡xkincastigaro ken noneki on yejuan noueyimatij.
3 NoTEKO
¿Hasta kamanon tlamis
iminnoueyimatilis on xompayejyeuamej?
4 Nochimej on yejuan kichijtinemij tlen xkuajli
xipan teitaj niman sanoyej noueyimatij;
¡sanoyej noueyiteneuaj!
5 Ay noTEKO,
yejuamej sanoyej kintlajyouiltiaj on motlapejpeniluan
niman sanoyej kintlaueltokatinemij.
6 Kinmiktiaj on kakaualtsitsimej niman on xchanejkej,
niman no kinmiktiaj on iknotsitsimej.
7 Yejuamej kijtouaj kitl toTEKO xkinta;
kijtouaj kitl iDios Jacob xkita tlinon kichiuaj yejuamej.
8 Xkakikan tlinon nemechijlis,
nemejuamej tontos yejuan xitlaj nenkimatij.
¿Hasta kamanon uelis nentlakajsikamatiskej?
9 ¿Tlen nenkuitiaj xtlakaki
on yejuan otechtlalilij tonakas para ma titlakakikan?
¿Niman nenkuitiaj xtlacha
on yejuan otechtlalilij tixtololojuan?
10 ¿Nenkuitia xtecastigaroua
on yejuan kinmelajkatlalia on naciones?
¿Niman nenkuitiaj xitlaj kimati
on yejuan kinmaka tlamatkilistli on tlaltikpaktlakamej?
11 ToTEKO kimatstikaj ika in tlaltikpaktlakamej
san tontojyotl kinejnemilijtokej.
12 Ay noTEKO,
sanoyej pakamikis on yejuan tikmelajkatlalia
niman on yejuan tikmachtia motlanauatiluan.
13 Yejua iyolika nemis ijkuak uajlas tlajyouilistli,
pero on yejuan xompayejyeua, uej kichas mikilistli.
14 ToTEKO xkintlalkauis itlapejpeniluan,
nion xkinkauas inseltimej on yejuan iyaxkauan.
15 On jueces oksejpa tekitiskej ikan chipauak tekiuajtiskej,
niman nochimej on yejuan yolchipajkej no ijki kichiuaskej.
16 ¿Akinon onechmanauij de on xompayejyeuamej
niman de on yejuan kichiuaj tlen xkuajli?
17 Tla toTEKO xnechpaleuiskia,
amanninin xok ninemiskia.
18 Ijkuak onikijtoj: "Ye niuetstikaj",
tejua noTEKO, ikan motetlajsojtlalis yejuan xkaman tlamis,
otinechpaleuiko.
19 Ijkuak sa tlajtlamach ika ninotenmatiya,
tejua otinechyoltlalij, niman otinechyolpaktij.
20 Tejua xuelis timouikas iminuan on teyolkuitijkej
yejuan xyolchipajkej,
yejuan xchipauak tekitij
niman xkintlakamatij on leyes.
21 Yejuamej kintlajtouiliaj
niman kintlajtlakolmakaj para kinmiktiaj
on yejuan xkipiyaj itlaj tlajtlakojli
niman yejuan kuajli nouikaj.
22 Pero noTEKO yejua nechejeua,
noDios ken sen ueyitetl yejuan nechmanauiya.
23 ToTEKO kichiuas para on xompayejyeuamej ma mikikan
ipampa on inxompayejyeualis.
¡ToDios yejua kimpopolos!