ToTEKO yejua Rey más ueyixtikaj
99
¡ToTEKO yejua Rey!¡Yejua, kipiya itrono intsajlan on querubines!
¡Ma kuekuetlakakan ikan nemojtijli on naciones,
niman nochi in tlaltikpaktli!
2 ToTEKO ueyixtikaj ipan on tepetl Sión;
yejua tlamandaroua impan nochimej on naciones.
3 Ma kiyekteneuakan iyektokatsin
yejuan sanoyej ueyixtikaj
niman yejuan nochi tlakatl kitlakaita.
¡Dios, yejua yektli!
4 Tejua tisen Rey yejuan sanoyej tiueyixtikaj,
yejuan mitspaktia on yolmelajkilistli.
Tejua xtitechikoita.
Tikchiua tlen kuajli niman tlen melajki
impampa on ikoneuan Jacob.
5 ¡Xyekteneuakan toTEKO Dios,
niman xmotlakuantelketsakan ikxitlan!
¡Dios, yejua yektli!
6 Moisés niman Aarón itiopixkauan katkaj.
Niman Samuel no kiueyiteneuaya toTEKO.
Ijkuak yejuamej kitlajtlaniliayaj toTEKO ma kimpaleui,
toTEKO kiminnankiliaya.
7 Dios okiminnots desde ijtik on moxtli mimiltik,
niman yejuamej okitlakamatkej itlanauatiluan
niman ileyes yejuan okiminmakak.
8 Tejua toTEKO Dios, tikiminnankiliaya
niman tikintlapojpoluiyaya,
pero no tikincastigarouaya
ijkuak kichiuayaj tlen xkuajli.
9 Xkueyilikan toTEKO Dios,
¡xmotlakuantelketsakan ixpan on iyektepeu!
¡ToTEKO Dios, yejua yektli!