ToTEKO yejua techmanauiya
91
Yejuan live imak on ueyixtikaj Dios,nochipa nomanauis itech on yejuan kipiya nochi poder.
2 Nejua nikijlis toTEKO:
"Tejua tinotemakixtijkau niman tinotemanauijkau.
TinoDios yejuan motech niktlalia noyojlo."
3 Yejua mitsmanauis ipan itlatlalil on temiktijketl,
niman de on kokolistli yejuan temiktia.
4 Yejua tej, mitsiyanas ikan imajtlapaluan
niman ijki xitlaj mopan nochiuas.
¡Yejua mitsmanauis ika iescudo
ijkon ken omitsprometerouilij.
5 Xtimakajsis on tlen temojtij nochiua ijkuak tlayoua,
nion on tlaminaltin yejuan kinxiniaj ijkuak tlajokaj.
6 No xtimakajsis on kokolistli yejuan yejko ipan yejuajli
nion on yejuan temiktia ipan tonajli.
7 Maski se mil mikiskej moopochnakastlan
niman 10 mil, moyeknakastlan,
tejua xitlaj mopan nochiuas.
8 Ika tlen melauak, tikitas ikan mixtololojuan
kenijki on xkuajkualtin tlakamej kiseliskej on tlen kinmelaua.
9 Pampa Dios yejuan más ueyixtikaj,
yejua mitspaleuis niman mitsmanauis.
10 Xitlaj mopan uajlas on tlen xkuajli,
nion kokolistli xajsis mochan.
11 Tej, Dios kinuajtitlanis iángeles
para mitscuidaroskej nochiuiyan kampa tias.
12 Yejuamej mitzketsteuaskej ika inmauan
para maka timokxikokos ikan tetl.
13 Tiuelis tinejnemis intech leones,
intech on temojtijkej yolkej
niman kouamej yejuan kipiyaj veneno.
14 Nikmakixtis on yejuan nechtlajsojtla,
niman nikmanauis on yejuan nechixmati.
15 Ijkuak nechnotsas, niknankilis;
nejua iuan ninemis ijkuak kipiya ajmantli;
nikmanauis niman nikmakas tetlakaitalistli.
16 Nikmakas miyek paktli ipan iueyi nemilis,
niman nikpaktis ika on temakixtilistli yejuan nikmakas.