Sen kuikatl de yekteneualistli
92
Tejua noTEKO akin sanoyej tiUeyixtikaj,¡sanoyej kuajli para timitsmakaskej tlaxtlauijli
niman titokuikatiskej para moueyilis!
2 Ijkuak kualkan niman ijkuak tlayoua,
nochipa tikteijliskej de on motetlajosojtlalis
yejuan xkaman tlamis,
niman ika xkaman titechkaua
3 chika titlatsotsonaskej
ikan on tlatsotsonajli arpa, niman salterio.
4 Ay noTEKO,
¡nejua sanoyej nipaki ipampa nochi on tlen yotikchiu!
¡Nochi on motekiu sanoyej nechpaktia!
5 ¡NoTEKO, sanoyej tetlatlachaltij nochi on tlen yotikchiu!
¡Sanoyej ueyi tlamachilistli tikpiya!
6 ¡On yejuan xitlaj kimatij, niman on yejuan tontos
xueli kajsikamatij!
7 Maski on xompayejyeuamej
niman nochimej on yejuan kichijtinemij tlen xkuajli,
miyekiyaj niman kuajli nemij,
popoliuiskej para nochipa.
8 Pero tejua noTEKO, más tiUeyixtias para nochipa.
9 Melauak tej, noTEKO,
nochimej on motlauelikniuan tikimpopolos,
nochimej on yejuan kichiuaj tlen xkuajli, tikinchajchayauas.
10 Tejua tinechmaka más chikaualistli
para ma nikojtik ken sen uakax,
niman tinechkuatekiya ikan aceite yejuan ajuiyak.
11 Onikitak ken notlauelikniuan okintlankej,
niman onikak on xompayejyeuamej chokistsajtsij.
12 On kuajkualtin tlakamej, sanoyej kuajli nemiskej.
Nemiskej kenon palmeras yejuan xochiyojkej,
niman miyekiyaj kenon cedrojkojtin yejuan onkaj ne Líbano.
13 Yejuamej nemij kenon kojtin
yejuan kuajli tôktokej ipan iueyi tiopan toTEKO,
niman xochiyouaskej ipan ikiauak toDios.
14 Ijkuak ye ueuentsitsimej yeskej, sanken tlakiskej;
nochipa kojtijkej yeskej,
niman xoxojkej yeskej kenon kojtin yejuan xe uejkaui onokej.
15 Niman kiteijliskej: "NoTEKO, notemanauijkau;
yejua yolmelajki niman yolchipauak."