Iyeika nemilis Dios niman iachijtsin nemilis sen tlakatl
90
NoTEKO, tejua titechajmanauijtiu desde yejuekaui niman hasta aman.
2 Antes onyaskiaj tepemej niman tlaltikpaktli,
desde yeuejkaui niman para nochipa, tejua tiDios.
3 Tikchiua para sen tlakatl oksejpa ma nochiua tlajli
ijkuak tikijtoua:
"Oksejpa xmochiuakan tlajtli, tlaltikpaktlakamej"
4 Melauak tej, para tejua se mil xipan,
ken se tonajli yejuan yopanok.
¡Ken san keski hora yeskia ijkuak tlayoua!
5 Tikchiua para tonemilis ma panotikisa ken sen atepeyatl
yejuan sanoyej kojtik,
ken se temiktli yejuan san panotikisa
ijkuak titlachaj,
noso ken itlaj xojtli.
6 Ken on xojtli,
yejuan kualkan noskaltia niman xochiponi,
pero ijkuak tiotlak pilini niman uaki.
7 Melauak tej, motlauel sanoyej techmotia.
¡Motlauel techtlamachilispoloua!
8 Tikmati de totlajtlakoluan
niman on tlen xkuajli tikchiuaj,
hasta totlajtlakoluan
yejuan ichtaka otikchijkej
onnejsij mixpan.
9 Melauak tej, nochi tonemilis tlami ipampa mokualanilis.
Tonemilis tlami ken itlaj ijyotl.
10 Tonemilis sa kanaj sententa xipan tikajxitiaj;
on yejuan más chikajtokej nemij hasta ochenta xipan.
Pero maski más miyek xipan nemij, sa axkan panouaj,
niman sa miyek tlajtlamach kijyouiyaj.
¡On tiempo sanoyej isijkapan panoua,
no ijki ken tejuamej tipanouaj!
11 ¿Akinon kixmati ipoder mokualanilis?
¿Akinon kimakajsi motemojti tlauel?
12 Xtechititi kenijki tikmatiskej
ika tonemilis nimantsin tlamis,
para ijkon tinemiskej ikan tlamatkilistli.
13 ¡NoTEKO xuajla totech!
¿Hasta kamanon más timouejkauas?
¡Xkinmikneli in motekitkauan!
14 Xtechyolpachiuiti ika motetlajsojtlalis
yejuan xkaman tlamis cada kualkan,
para ikan paktli titokuikatiskej nochi tonemilis.
15 Xtechmaka on tonaltin de pakilistli
san no ijki kenon tonaltin de ajmantli yejuan yotikpixkaj.
16 ¡Xchiua para on motekitkauan niman inuejkakoneuan
ma kitakan on ueyi tlajtlamach tlen tikchiua niman moueyilis!
17 Moueyilis toTEKO Dios ma onya topan,
niman xtiochiua totekiu.
¡Kemaj, xtiochiu totekiu para nochipa!