Ipacto Dios iuan David
89
NoTEKO, ipan nokuikalis nochipa nikijtos on motetlajsojtlalis yejuan xkaman tlamis;
nochipa nikteijlis ika tejua xkaman titechkaua.
2 Nikteijlis ika motetlajsojtlalis xkaman tlami;
ika on tlen tikijtoua xkaman tikpatla
no ijki kenon cielo xkaman nopatla.
3 Otikchiu sen pacto iuan David.
Ijkin otikprometerouilij motekitkau David:
4 Nikchiuas para mouejkakoneuan
ma tlamandarokan nochipa ijkuak xok tinemis.
5 Oh noTEKO, nochimej moángeles kiyekteneuaj
on tetlatlachalistin tikchiua
niman ika nochipa tikchiua on tlen tikprometeroua,
6 ¡pampa xakaj nemi ne iluikak ken tejua noTEKO!
¡Xakaj ángel nemi sa no ijki ken tejua!
7 Dios, sanoyej tiueyixtikaj niman titemojtij;
hasta on más uejueyixtokej moángeles mitsyejyeualojtokej
niman mitstlakaitaj.
8 NoTEKO Dios yejuan nochi tiueli,
nochi on ueyilistli moyaxka
niman nochipa tikchiua on tlen tikprometeroua.
¡Xakaj nemi ken tejua!
9 Tejua tikmandaroua on mar ijkuak chikauak noketsteua,
niman tikteltia para makasa noketsteua on olas.
10 Otikpaxoj niman otikmiktij on temotij yolki
yejuan nemi ijtik on mar.
Ikan mopoder otikintlan on motlauelikniuan.
11 On cielo niman in tlaltikpaktli moyaxkauan;
tejua otikchijchiu in tlaltikpaktli,
niman nochi on yejuan ipan nemij niman ipan onkaj.
12 Tejua otiktlalij nochi on tlajli de norte niman on tlajli de sur;
on tepemej Tabor niman Hermón
mitskuikatlaliaj ikan pakilistli.
13 Momametskojyo nochi ueli kichiua;
moyekma kojtik niman tetlani.
14 Tejua titlamandaroua ikan melajkilistli, ken kitocaroua;
nochi on tlen tikchiua kiteititia motetlajsojtlalis
niman ika nochipa tikchiua on tlen tikijtoua.
15 Oh noTEKO, sanoyej kipiya paktli on yejuan mitsyekteneua,
pampa nejnemi ikan motlauil.
16 Yejuamej pakij nochipa mopampa.
Yejuamej mitsueyiteneuaj ika on tlen tikchiua melajki.
17 Motech tikseliaj ueyilistli niman poder,
niman ipampa moyolkuajlilis,
mopoder noskaltijtiu topan.
18 ¡ToTEKO techmanauiya ken yejua toescudo!
¡ToRey yejua Yektli de intech on israelitas, on ikoneuan!
19 Achtoj yotikijtojka ipan sen tetlatlachalistli,
niman otikinmijli on motekitkauan yejuan xkaman mitskauaj:
"Yoniktlapejpenij se yejuan yolchikauak
intech notlapijpeniluan on israelitas,
niman yoniktlalij para ueyixtias
niman yonikpaleuij para kipiyas poder para tlamandaros.
20 Yoniknextij notekitkau David
niman yonikuatêkij ika noyekaceite para rey yes.
21 Xkaman nikauas ika nikpaleuis.
Ikan nopoder nikmakas yolchikaualistli!
22 Niman xkuijsokiskej itlauelikniuan,
nion xkitlaniskej on xkuajkualtin tlakamej.
23 Nikinxakualos itlauelikniuan ixpan;
¡nikinmiktis on yejuan kitlauelitaj!
24 Niktlajsojtlas niman xkaman nikauas.
Niman san nopampa más ueyiyas ipoder.
25 Niman no nikchiuas para yejua tlamandaros
desde on mar Mediterráneo hasta on río Éufrates.
26 Yejua nechijlis:
Tejua tinotataj niman tinoDios;
tejua tinechmakixtia niman tinechmanauiya.
27 Niman nejua nikchiuas para yejua noyenkuiyokoneu yes,
niman más ueyixtias rey ipan in tlaltikpaktli.
28 Nochipa nikmakas notetlajsojtlalis,
niman nopacto xkaman tlamis.
29 Iuejkakoneuan nochipa tlamandaroskej
ijkuak yejua xok nemis,
chika on cielo saken onkaj.
30 Pero tla yejuamej xok kitlakamatij notemachtiluan
niman xnouikaj ken kijtoua notlanauatiluan,
31 tla xkintlakaitaj noleyes
niman xkintlakamatij notlanauatiluan,
32 nikincastigaros imintlajtlakoluan ika sen chikotaj
niman kintlajyouiltis ipampa on tlen xkuajli kichiuaj.
33 Pero xnikauas ika niktlajsojtlas David,
niman xnikauas ika nikchiuas ken onikprometerouilij.
34 Xnikelkauas nopacto yejuan nikpiya iuan,
nion nikpatlas notlajtol.
35 Oniktlajtolmakak David ikan noyektokatsin,
niman ijkon xnikajkayauas.
36 Iuejkakoneuan tlamandaroskej nochipa ijkuak xok nemi,
chika on tonaltsintli onkaj.
37 ¡Nopacto iuan David nochipa ijki yes
kenon metstli nochipa onkaj!
¡Nochipa ijki yes chika on cielo onkaj!
38 Pero aman yotikchichiu
niman yotiktlalkauij on rey
yejuan tejua otiktlapejpenijka.
¡Aman yotiktlauelitak!
39 Yotikxotonij mopacto iuan motekitkau;
Yotiktlajkal itrono ipan tlajli.
40 Yotiktlajkal on tepanchinantli de on iueyikalpan,
niman yotikinxoxotonij on torres
kampa nomanauiyaya ne Jerusalén.
41 Nochi tlakatl yejuan panoua kichtekij tlen kinekij,
chika innisiuchanejkauan ika uetskaj.
42 Otikchiu para itlauelikniuan ma tetlanikan,
niman otikchiu sanoyej ma pakikan.
43 Iespada otikixtilij itlatekyo,
niman xotikpaleuij ipan on tlauijsokilistli.
44 Otikixtilij iueyilis,
niman otiktlajkalilij itekiuajyo ipan tlajli.
45 Otikuilij keski xipan de inemilis,
niman otiktemitij ika pinaualistli.
46 Oh noTEKO,
¿Hasta kamanon timiyantias?
¿Nochipa tekuintias mokualanilis, ken tlitl?
47 NoTEKO, xkelnamiki ika xueyi nonemilis nikpiya.
On tlaltikpaktlakamej yejuan tejua tikinmiskaltia,
nemij san keski xipan.
48 ¡Xakaj uelis nemis niman xkaman mikis!
¡Xakaj uelis nomanauis itech ipoder on mikilistli!
49 NoTEKO, ¿kanon onkaj on moachtotetlajsojtlalilis
yejuan ika kuajli moyojlo otikprometerouilij David?
50 NoTEKO, xkelnamiki
ken motekitkauan miyek tlakatl kimpijpinauiya.
Yonikijyouij miyek tlauijuikaltijli ipan noyojlo
de miyekej naciones.
51 Ay noTEKO, ¡Ijkin nechuijuikaltiaj motlauelikniuan!
Ijkin nechuijuikaltiaj nejua
yejuan otinechtlapejpenij para nirey.
52 ¡Nochipa ma mitsyekteneuakan toTEKO!
¡Ma ijki nochiua!