¿Tline xtikneki tinechkakis noTEKO?
88
NoTEKO, noDios niman noTemakixtijkau,ipan tonajli niman ipan yeuajli
nimitsajmankatlajtlanilia xnechpaleui.
2 ¡Xseli noueyikatsajtsilis!
¡Xkaki tlinon nimitsiknotlajtlanilia!
3 Miyek tlajtlamach nikijyouiya tlen xkuajli,
hasta machisti ye nimiktikaj.
4 ¡Miyekej kijtouaj xok ninemis,
pampa semi xok nikojtik!
5 Yonechkajkej noselti intsajlan on mikatsitsimej.
Yoninokau kenon yejuan mikij ipan guerra,
niman ompa kintôkateuaj.
Ninemi kenon yejuan xok tikincuidaroua
niman yotikinmelkau.
6 Machisti ken yotinechontlajkal ijtik sen uejkatlan tlaltekontli
kampa sanoyej tlayouatok.
7 Motlauel nopan yoyetiyak,
¡ken itlaj ueyi akoxonajli nopan onkaj!
8 Otikchiu para on notlajsojkaikniuan ma nechtlajyelitakan.
¡Ninomati ken se yejuan tsakutikaj niman xueli choloua!
9 Hasta xok nitlacha pampa sanoyej nichoka.
¡Mojmostla ninoajmankaueyikatsajtsilia motech noTEKO,
niman motech nikintelketsa nomauan!
10 Tla tikchiua milagros impampa on mikatsitsimej,
¿yejuamej uelis mitsmakaskej tlaxtlauijli?
11 On yejuan nemij ipan on tlalkontli
xueliskej kijtoskej ika sanoyej titetlajsojtla
ikan sen tetlajsojtlalistli yejuan xkaman tlamis.
Nion ueliskej kijtoskej ika nochipa tikchiua kuajli
ken tikiprometeroua.
12 Ipan on tlayouajlotl kampa onkaj on mikilistli,
kampa se nochi kelkaua,
xok yakaj nemis yejuan kijtos ika tejua tiyolmelajki,
niman ika tikchiua uejueyi tetlatlachalistin.
13 Pero nejua noTEKO, ninoajmankaueyikatsajtsilia;
ijkuak kualkan nimitsnotsa ipan noueyikatsajtsilis.
14 ¿NoTEKO, tline xtikneki tinechkakis?
¿Tline timiyana de nejua?
15 Desde nikonetl sanoyej yonitlajyouij.
Kamanian onikmat semi ye nimiktikaj.
Miyek tlajyouilistli otinechajtitlanilij
niman machisti xok nikxikos más.
16 On motlauel yejuan nopan ouajlaj, yonechtlan.
17 Nechyejyeualojtikaj nochi tiempo kenon atl yeskia.
18 Otikchiu para on notlajsojkaikniuan
niman on nocompañeros, ma nechtlalkauikan,
niman aman san iuan ninouika on tlayouajlotl.