San tejua tiDios toTEKO
86
Xkaki tlinon nimitsijlia noTEKO,pampa sanoyej ninajmana niman xitlaj nikpiya.
2 Xnechcuidaro, pampa nejua xkaman nimitstlalkauiya.
Tejua tinoDios;
¡xnechmakixti nejua nimotekitkau,
pampa nejua niktlalia motech nochi noyojlo!
3 Xnechikneli noTEKO,
pampa nejua nochipa motech ninoueyikatsajtsilijtikaj.
4 Xnechyoleua noTEKO para ma nipaki,
pampa nejua nimotekitkau,
niman tejua motech ninoueyikatsajtsilia,
5 niman pampa tejua noTEKO, kuajli moyojlo
niman titetlapojpoluiya.
Sanoyej tikintlajsojtla ikan motetlajsojtlalis
on yejuan xkaman tlamis
on yejuan motech noueyikatsajtsiliaj.
6 ¡NoTEKO, xkaki noueyikatsajtsilis.
¡Xkaki tlinon nimitsiknotlajtlanilia!
7 Ijkuak nikpiya tlajyouilistli,
motech ninoueyikatsajtsilia,
pampa tejua tinechnankilia.
8 ¡Xnemi okse dios ken tejua noTEKO!
¡Xakaj ueli kichiua on uejueyi tlajtlamach ken tejua tikchiua!
9 Ay noTEKO,
tejua otikchiu para ma onyakan nochimej on naciones,
niman yejuamej uajlaskej motech para mitsmauistiliskej
niman para kiueyiteneuaskej moyektokatsin.
10 San tejua tiDios.
¡Tejua tiueyixtikaj,
niman tikchiua uejueyi tetlatlachalistin!
11 Ay noTEKO, xnechititi moojui,
para nochipa yejua ipan ma ninejnemi.
Xchiua para noyojlo ma kitlakaita moyektokatsin.
12 NoTEKO niman noDios,
nimitsyekteneuas ikan nochi noyojlo,
niman nochipa nikueyiteneuas moyektokatsin.
13 ¡Sanoyej ueyi motetlajsojtlalis otinechpiyalij
yejuan xkaman tlamis!
¡Otinechmanauij para xoniaj miktlan!
14 Ay noDios,
on yejuan xtetlakaitaj niman temiktiaj,
nechixnamikij niman kinekij nechmiktiskej.
Yejuamej xmitsmakajsij.
15 Pero tejua noTEKO,
tiDios yejuan titetlajsojtla niman titeiknelia;
xnimantsin tikualani;
sanoyej titetlajsojtla,
niman nochipa tikijtoua tlen melauak.
16 Xnechita, ¡xnechikneli!
¡Xnechmanaui nejua nimotekitkau!
¡Xnechmaka chikaualistli!
17 Ijkuak on yejuan sanoyej nechtlauelitaj kitaskej
ika tinechpaleuiya niman tinechyoltlalia,
yejuamej pinauaskej.