Oksejpa xtechmanaui toTEKO
85
Tejua toTEKO,sanoyej kuajli yotikchiu iuan mopaís,
pampa tejua otikchiu
para on israelitas oksejpa okiselijkej on riquezas
yejuan achtoj kipiyayaj.
2 Tejua yotikintlapojpoluilij
inxompayejyeualis in motlapejpeniluan;
nochi intlajtlakoluan yotikintlapojpoluilij.
3 Kuajli yotitlauelseu; xok tikualani.
4 Aman tej toDios niman toTemakixtijkau,
xtechmakixti, niman makasa xkualani touan!
5 ¿Tlen yej nochipa tikualantias touan?
6 ¿Tlen xoksejpa titechmakas nemilistli,
para tejuamej yejuan timotlapejpeniluan
ma tipakikan motechika?
7 Ay toTEKO,
¡Xtechititi motetlajsojtlalis yejuan xkaman tlamis,
niman xtechmakixti!
8 Kuajli nikaki on tlen toTEKO kijtoua,
pampa kimprometerouilia
kinmakas yolseuilistli on itlapejpeniluan
yejuan kitlaliaj iminyojlo itech,
tla xoksepa kichiuaj on tontojyotl.
9 Melauak tej, Dios semi nisiu nemi,
para kinmakixtis on yejuan kitlakaitaj,
niman ijki, iueyilis onyas touan ipan totlal.
10 "Dios yejuan kitlajsojtla Israel uajtlachixtikaj ne iluikak,
niman Israel yejuan nouika kuajli iuan Dios
ontlachixtikaj desde nikan tlaltikpak,
niman ijkon nonamikij.
Israel yejuan kuajli nouika iuan Dios,
kiselis yolseuilistli yejuan Dios kimakas."
11 Israel yejuan nouika kuajli iuan Dios
ontlachixtika desde nikan tlaltikpak,
niman Dios yejuan nochipa kitlajsojtla Israel
uajtlachixtika desde ipan cielo.
12 ToTEKO, sano yejua kuajtitlanis on kiautli,
niman ipan in totlal, kuajli tlatlakis.
13 On tlen melajki, yejua yakatstias kampa yas toTEKO,
niman yejua kuektlalilis iojui para yejua uajlas.