Ikan nochi noyojlo nikneki ninemis ipan iueyitiopan noDios
84
¡Sanoyej kualtsin moueyitiopan,noTEKO, yejuan nochi tiueli!
2 ¡Sanoyej nikneki ninemis ipan ikiauak moueyitiopan!
Ikan nochi noyojlo ninokuikatia ikan paktli
para Dios yejuan nochipa nemi!
3 Oh noTEKO yejuan nochi ueli tikchiua,
norey niman noDios,
hasta on tototl itoka gorrión
niman on tlapayautototl kinextiaj ipan motlaixpan
kampa kichijchiuaj intepajsol para kintlapanaltiaj inkoneuan.
4 Kipiyaj ueyi paktli
on yejuan chantij ipan moyektiopan
niman mitsueyiteneuaj nochipa.
5 ¡Kipiyaj ueyi paktli
on yejuan motech kinextiaj tlapaleuilistli,
on yejuan kinekij uajnejnentiaskej
hasta moueyitiopan yejuan onkaj ipan on moyektepeu!
6 Ijkuak kipanoskej on uaki ixtlauatl itoka Chokaloyan,
on ixtlauatl nopatlas niman onyas miyek amejli,
niman onyas on achtoj kiautli
yejuan kintemiltis on amanalchijchijtin
ikan miyek tlatiochiualistli.
7 Yejuamej yajtiaskej niman kajsitiaskej más poder,
niman ne Sión kitaskej Dios ueyixtikaj.
8 ¡NoTEKO, Dios yejuan nochi ueli tikchiua!
¡Xkaki nooración, iDios Jacob!
9 Oh Dios, xkita ikan pakilistli on yejuan techmanauiya,
on yejuan tejua yotiktlapejpenij ken torey.
10 ¡Más kuajli ninemis se tonajli ipan moyektiopan,
xken ninemis se mil tonaltin oksekan!
¡Más kuajli ninemis
ken sen nitsakuijlotlapojketl ipan iyektiopan noDios,
xken nichantis ne kampa chantij on xompayejyekej.
11 Más kuajli pampa toTEKO Dios techtlauiluiya
niman techmanauiya.
ToTEKO kintlajsojtla niman kintlakaita
on yejuan chantij ikan yolchipaualistli
niman kinmaka nochi tlen kuajli.
12 ToTEKO yejuan nochi ueli tikchiua,
on yejuan kitlaliaj nochi inyojlo motech sanoyej kipiyaj paktli.