Sen ueyikatsajtsilistli para kitlajtlaniliaj itlapaleuil Dios
83
Ay noDios, ¡itlaj xkijto!¡maka san xmokaua! ¡xtechnankili!
2 Xkinta on motlauelikniuan yejuan sanoyej mitstlauelitaj:
Yonajkomankej niman xipan mitsitaj.
3 Yotechtlajtouilijkej para techchiuiliskej tlen xkuajli
tejuamej yejuan timotlapejpeniluan,
¡yejuan sanoyej titechtlajsojtla!
4 Yokinemilijkej techajmiktiskej tinochimej
para kipopoloskej tonación,
niman para xokaman techelnamikisej yejuan tiisraelitas.
5 In yejuamej yejuan san sekan yonotlajtolmakakej
para mitsixnamikiskej:
6 iuejkakoneuan Edom niman de Ismael,
iuejkakoneuan Agar niman de Moab,
7 iuejkakoneuan Gebal, Amón niman Amalec,
on filisteos, on yejuan chantij ipan on ueyikalpan Tiro.
8 Niman hasta on asirios iminuan yonosentlalijkej,
niman on asirios,
yejuamej sanoyej kimpaleuiyaj on iuejkakoneuan Lot.
9 Yejuamej no ijki xkinchiuili ken otikchiuilij Madián,
ken otikchiuilij Sísara,
niman ken otikchiuilij Jabín ipan on ayajtok Quisón.
10 Nochimej yejuamej omikkej ne kampa itoka Endor,
¡niman inmikatlalnakayo onochiu abono para on tlajli!
11 On uejueyixtokej tlakamej no ijki xkinchiuili
ken otikchiuilij Oreb niman Zeeb,
niman no ijki xkinchiuili nochimej on intlayekankauan
ken otikchiuilij Zeba niman Zalmuna,
12 yejuan kinekiyaj kinoyaxkatiskej on kuajli tlajli
yejuan iyaxka Dios.
13 Tejua noDios, xkinmejkuani kenon tlajsojli
yejuan kuika ajkomalakotl,
kenon polokatl yejuan on ajakatl kajkotoktia.
14 Niman ijkon kenon tlitl nejnemi para kitlatia on kojyoj
niman on sakayoj,
15 ¡tejua no ijki xkintotoka ika on ajkomalakotl,
niman xkinmomojti ika on ajakakiautli!
16 ¡Xkimpinajti noTEKO, para ijkon ma kimatikan ika tejua tiDios!
17 Ma kintlankapiyakan
niman nochipa ma mojkamikikan.
¡Ma nopinajtikan niman ma mikikan!
18 ¡Ma kimatikan ika san tejua titeTEKO,
san tejua tiUeyixtikaj ipan nochi in tlaltikpaktli!