Itetlajsojtlalis Dios niman itlajtlakol Israel
81
¡Ma tikuikatlalikan Dios ikan paktli!¡Yejua totemanauijkau!
¡Ikan miyek paktli ma tikueyiteneuakan iDios Israel!
2 Ma titokuikatikan ika on tlatsotsonajli pandero,
ika on arpa yejuan sanoyej kualtsin kakisti,
niman ika on salterio.
3 Ma tikpitsakan on tlapitsajli
ijkuak yenkuik metstli,
niman no, ijkuak kuajli temi on metstli,
ijkuak tikchiuaj on ueyi iluitl.
4 Pampa in sen tlanauatijli
yejuan iDios Jacob okiminmakak on israelitas.
5 Sen tlanauatijli yejuan okimakakej Israel
ijkuak Dios oyaj okitlajyouiltito Egipto.
Onikak sen tlajtojli yejuan xnikmatiya tlinon kijtosneki:
6 "Yonimitskixtilij on motlamamal
yejuan tikpiyaya mokechpan;
yonimitskixtilij on chikajkatekitl de tabiques.
7 Ijkuak titlajyouiyaya, otinechnots
niman nejua onimitsmanauij;
onimitsnankilij ipan on moxtli
kampa tlakomoniya;
onimitstlatlatak ipan motlaneltok ne itech on atl Meriba
ijkuak otikijtoj xtikpiya atl.
8 Xnechkakikan notlapejpeniluan tlinon nemechixkuitia;
¡sanoyej kuajli yeskia
tla nennechtlakamatiskiaj nemejuamej israelitas!
9 Maka xkimpiyakan oksekimej dioses,
maka xkinmauistilikan on dioses
yejuan xnenkinmixmatij.
10 Nejua ninemoTEKO Dios, yejuan onemechkixtij Egipto.
Xtlapokan nemokamak, niman nejua nemechixuiltis.
11 "Pero on notlapejpeniluan xokinekkej onechkakej.
¡On israelitas xokinekkej onechtlakamatkej.
12 Yejua ika, onikinkauilij okichijkej tlen okinekkej,
niman onouikakej ken yejuamej más okuelitakej.
13 ¡Nechpaktiskia tla on notlapejpeniluan nechkakiskiaj!
¡Tla on israelitas nejnemiskiaj ipan noojui,
14 nejua nimantsin nikintlajyouiltiskia intlauelikniuan,
niman nikincastigaroskia on yejuan kintlauelitaj!"
15 On yejuan sanoyej kitlauelitaj toTEKO,
ikan miyek nemojtijli nokneliskiaj itech,
niman intlajyouilis yeskia para nochipa.
16 Pero itlapejpeniluan Dios, kinkualtiskia on más kuajli trigo,
niman kinmaixuiltiskia ikan on tepenekutli yejuan más kuajli.