ToTEKO ma techikneli niman ikan ipakilis topan ma tlacha
80
Tejua itlajpixkau Israel,yejuan tikyekana itribu* José ken moborregos yeskiaj,
tejua yejuan tikpiya motrono intsajlan on querubines*,
¡xtechkaki!
¡Xkikneli Efraín,
2 Benjamín niman Manasés!
¡Xtlacha topan ikan pakilistli,
niman xuajla xtechmakixtiki ikan mopoder!
3 Ay noDios,
¡tejua xchiua para oksejpa ijki ma tinemikan
ken achtoj tinemiyaj!
¡Xtechikneli niman xtechmakixti!
4 ToTEKO Dios, yejuan nochi ueli tikchiua,
¿hasta kamanon sanken toka tikualantias
niman tiktlauelmatstias iminoraciones on motlapejpeniluan?
5 Xok titechmaka tlakuajli,
yej titechmaka chokistli,
nion xok tatlij, yej tikonij toixayo.
6 Yotitechtekauilij
para ma techpijpinauikan on tonisiuchanejkauan,
niman on totlauelikniuan toka uetskaj.
7 Tejua toDios, akin nochi ueli tikchiua,
¡xchiua para oksejpa ijki ma tinemikan ken achtoj tinemiyaj!
¡Xtechikneli niman xtechmakixti!
8 Tejua otitechkixtij Egipto,
ken tikixtiskia sen uvajkuamekatl,
niman otikinkixtij on chanejkej ipan in tlajli
para nikan otiktôkak.
9 Otikchipau in tlajli para otiktôkak on uvajkuamekatl,
niman sanoyej ononeluayotij, hasta okitemiltij in país.
10 Itlaseuajlo okintlapachoj on tepemej,
niman imauan okintlapachoj on kojtin
yejuan más ueuejkapanmej.
11 On imajmauan oajsikej
hasta ipan on mar Mediterráneo,
niman on iitsmolinyouan oajsikej
hasta ipan on río Éufrates.
12 ToTEKO, ¿tline otikauilij ma uetsi itlatsakuyo on uvasyoj
niman aman san akinon yejuan panoua ipan ojtli
ueli kiteki itlakyo?
13 On kuapitso kipojposteki,
niman on tepeyolkej kikualiaj itlakyo.
14 Dios, yejuan nochi ueli tikchiua,
timitstlajtlaniliaj para xuajla.
Xtechalita desde ne iluikak
niman xkinmikneli in mokoneuan,
yejuan ken sen uvajkuamekatl yeskia,
15 on uvajkuamekatl, yejuan sano tejua otiktôkak,
on uvajtlatsmolintli yejuan otiktôkak para tejua.
16 Xkincastigaro ikan nochi motlauel
on yejuan kitekij niman kitlatiaj.
17 Pero xkimpaleui in mokoneuan
yejuan tejua yotikintlapejpenij,
yejuan tejua otikinmakak chikaualistli,
18 niman xokaman timitstlalkauiskej.
¡Xtechmaka nemilistli,
niman san tejua timitsyekteneuaskej!
19 Ay toTEKO Dios, akin nochi ueli tikchiua,
¡tejua xchiua para oksejpa ijki ma tinemikan
ken achtoj tinemiyaj!
¡Xtechikneli niman xtechmakixti!