Ueyi ajmantli pampa oxoxoton Jerusalén
79
Ay noDios,on yejuan xmitsneltokaj yokalakkej ipan motlal
niman yokinoyaxkatijkej.
Yokijtlakojkej on moyektiopan,
niman on ueyikalpan Jerusalén yokixoxotonijkej.
2 Yokinmiktijkej motekitkauan
yejuan xkaman mitstlalkauiyayaj,
niman yokinkajtejkej para ma kinkuakan on totomej
niman on tepeyolkej yejuan nakakuanij.
3 Okitoyajkej iminyesyo ken itlaj atl ipan nochi Jerusalén,
niman xnemi akin kintlaltôkas.
4 Aman toka uetskaj on tonisiuchanejkauan,
techpijpinauiyaj on yejuan toyeualkan chantij.
5 Ay toTEKO,
¿Hasta kamanon toka tikualantias?
¿Tlen nochipa kauantias on motlauel ken itlaj tlitl?
6 ¡Impan xmotlauelkixti on reyes yejuan xmitsmauistiliaj,
yejuan xmitsixmatij
niman yejuan xkinekij mitsueyiteneuaskej!
7 Yejuamej otlan kinmiktiaj iuejkakoneuan Jacob
niman okinxoxotonilijkej impaís.
8 Maka xtechcastigaro tejuamej ipampa intlajtlakoluan toachtojtajuan.
¡Saniman xuajla xtechikneliki,
pampa nion achijtsin xok tikojtikej!
9 Ay toDios, toTemakixtijkatsin,
¡xtechpaleui, xtechmanaui
niman xtechtlapojpolui ipampa iueyilis moyektokatsin!
10 Maka ma kijtokan on yejuan xmitsneltokaj:
"¿Kanon nemi iminDios?"
¡Xtechkauili ma tikitakan ken tikintlakuepiltis
on yejuan okinmiktijkej motekitkauan!
¡Niman on yejuan xmitsneltokaj, no ma kitakan!
11 Xkaki inajmanalis on yejuan tsakutokej,
niman xkinmanaui on yejuan yokintlajtlakolmakakej
para kinmiktiskej.
12 Ay toTEKO,
xkintlakuepilti chikomepa on tonisiuchanejkauan
ipampa on tlauijuikaltilistli yejuan mitsijliaj.
13 Niman kemaj tejuamej yejuan timotlapejpeniluan,
yejuan ken timoborregos yejuan tinemij ipan mosakayoj,
nochipa timitsmakaskej tlaxtlauijli,
niman timitskuikatlaliskej ikan yekteneualistli para nochipa.