Dios tlajtlamach ika okimpaleuij itlapejpeniluan
78
Notlapejpeniluan, xkakikan notemachtil;¡kuajli xkakikan tlinon nemechijlia!
2 Nemechnojnotsas ikan tlamatkitlajtoltin;
nikpantlatis tlajtlamach
yejuan ichtaka onkatka desde yeuejkaui.
3 Nochi on tlen yotikakej niman tikmatij,
yejuan totajuan otechtlajtlajtouilinkej,
4 tejuamej xtikinmiyaniliskej tokoneuan.
Iminuan on yejuan uajnentiaskej,
tikueyiteneuaskej toTEKO,
niman tikteijliskej de ipoder,
niman on tlamauisoltin yejuan okichiu.
5 Dios okitlalij ileyes para iuejkakoneuan Jacob;
okitlalij kenijki nouikaskej ikoneuan Israel,
niman okinnauatij touejkatajuan
para ma kintitikan inuejkakoneuan,
6 para ijkon kixmatiskej on tekoneuan yejuan aman nemij,
niman no on yejuan xe nemi,
niman yejuamej no kintitiskej inkoneuan.
7 Kemaj yejuamej kitlaliskej nochi inyojlo itech toTEKO,
niman ijkon xkelkauaskej on tlen yejua okichiu,
niman kitlakamatiskej itlanauatiluan.
8 Yejuamej xnemiskej ken iminachtojtajuan
yejuan xipanteitakej katkaj niman tsontekonchikajkej,
nion xkipiyayaj san se inyojlo itech toTEKO.
¡Tlakamej yejuan okitlalkauijkej iminTEKO!
9 On soldados de itribu Efraín
armados katkaj ikan arcos niman tlaminaltin,
pero xoyajkej ipan on nouijsokilistli.
10 Xokitlakamatkej ipacto Dios,
nion xokinekkej okitlakamatkej itemachtiluan.
11 Okelkajkej on tlen yejua okichijka,
de on tlamauisoltin yejuan okintitij.
12 Chika kitstikatkaj,
Dios okichiu tlamauisoltin imixpan nemotajuan
ipan on región de Soan,
yejuan onkaj Egipto.
13 Okitlajkoxeloj on mar, niman ipan okimpanoltij;
okiteltlalij on atl ken itlaj tepantli.
14 Ipan tonajli okinyekan ika sen moxtli mimiltik,
niman ipan yeuajli ika sen tlimilinajli yejuan kintlauiluiyaya.
15 Ipan on xalpatlajkan, okitlapan sen ueyi tetl,
niman okixtij miyek atl yejuan okinmonitij.
16 ¡Dios okueponaltij sen ayajtok
ikan miyek atl ipan sen ueyi tetl
niman oakuepon ken sen ueyi río!
17 Pero yejuamej sa ika nemiyaj tlajtlakouayaj ixpan Dios;
xipan okitakej on Ueyixtikaj Dios ne ipan xalpatlajkan.
18 Okitlatlatakej ijkuak okitlajtlanijkej nakatl para intolixyo.
19 Ijkin tlamach okijtojkej de yejua,
"¿Tlen manin uelis techtlalilis sen mesa
para ipan titlakuaskej nikan ipan xalpatlajkan?
20 On melauak yejua okixtij miyek atl ipan sen ueyi tetl,
niman oakuepon ken sen ueyi río;
¿pero manin uelis kinmakas pan
niman nakatl on itlapejpeniluan?
21 Ijkuak toTEKO ijkon okak sanoyej okualan;
itlauel onochiu ken itlaj tlitl,
niman impan ouets iuejkakoneuan Jacob,
22 pampa xokipixkej inyojlo itech Dios,
nion xokineltokakej ika yejua kimpaleuiskia.
23 Pero Dios okinauatij on cielo,
niman okitlapoj ken sen tsakuijlotl,
24 niman okichiu para oxin on teutli itoka maná
para itlapejpeniluan,
niman okinkualtij on trigo yejuan oualeu ipan cielo
niman yejuamej okikuajkej.
25 Yejuamej, maski san tlakamej,
okikuajkej tlakuajli yejuan kikuaj ángeles.
¡Dios okinmakak tlakuajli miyek hasta kuajli oixuikej!
26 Kemaj, kampaka ikisayan tonaltsintli niman kampaka Sur,
ouajlaj sen ajakatl.
¡Dios okuajkik ikan iueyi poder!
27 Niman no okichiu para oxinikoj sanoyej miyekej tektotomej
para yejuamej,
ijkon ken miyek xajli onkaj itempan mar.
28 Dios okichiu para ma xinikan ipan on campamento
nochiuiyan iyeualkan iminkaluan de telaj.
29 Niman otlakuajkej hasta kampa sanoyej oixuikej,
niman ijkon Dios okiyolpachiuitij intolixyo.
30 Pero ijkuak xe tolixtlamiyaj,
niman sanken kamatentikatkaj ikan miyek nakatl,
31 itlauel Dios impan ouets,
niman okinmiktij on tlakamej
yejuan más kojtikej katkaj.
¡Okinmiktij nochimej on tlakamej israelitas
yejuan más chijchikajtikatkaj!
32 Pero maski Dios ijkon okinchiuilij,
yej sanken tlajtlakouayaj;
xokineltokakej on uejueyi tlamauisoltin
yejuan Dios okichiu.
33 Yejua ika Dios, nimantsin okinnemiliskoton,
niman impan ouajlaj sen temojtij mikilistli.
34 Ijkon tej, ijkuak Dios kincastigarouaya,
on oksekimej uajlayaj itech,
noyolkuepayaj niman peuayaj kitlakamatiyaj.
35 Ijkuakon, kemaj uej kelnamikiyaj on más Ueyixtikaj Dios
yejuan imimpan tlachaya niman kinmanauiyaya.
36 Pero maski yejuamej
ikan kualtsin tlajtojli kiprometerouiliayaj toTEKO
ika kuajli nouikaskej,
yej san kajkayauayaj,
37 pampa xnejli noyolpatlayaj
niman xkaman okitlakamatkej ipacto Dios.
38 Pero toTEKO kinmikneliaya niman kintlapojpoluiyaya.
Yejua ika xkinmiktiaya nochimej,
yej miyekpa okiteltij itlauel
niman xok kincastigarouaya
maski sanoyej kualaniayaj.
39 Dios okelnamik ika yejuamej san tlaltikpaktlakamej,
yejuan kenon ajakatl san panotikisa,
niman xokaman uajnokuepa.
40 Sanoyej miyek xipan xokitlakmatkej Dios,
niman okiyolajmankej ipan on xalpatlajkan.
41 Miyekpa okitlatlatakej Dios,
niman sanoyej okiyolajmankej on Dios de Israel
yejuan sanoyej yektli.
42 Okelkajkej on tonajli
ijkuak Dios okinmanauij
ikan miyek poder intech intlauelikniuan.
43 Okelkajkej ijkuak ne Soan,
ipan on tlajli Egipto,
okichiu miyek uejueyi tetlatlachalistin.
44 Okelkajkej ijkuak okuep yestli on atl ipan ríos,
niman on egipcios xouel okonikej on atl.
45 Okelkajkej ijkuak okiuajtitlan on tekuanimej sayolimej
intoka tábanos,
niman on atemomej yejuan nochi kikuayaj
niman kitlamiyayaj,
46 niman on chapolimej okinmakak on tlakyotl
yejuan yejuamej okitekitkej.
47 On tejsiutli okixaxakualoj iminuvasyoj,
niman on sekutli okitlatij itlakyo higos.
48 Inuakaxuan niman imborregos omikkej ikan on tejsiutli
niman on tlapetlanajli yejuan impan ouets.
49 Dios sanoyej okualan niman okincastigaroj chikauak.
Okinuajtitlanilij miyek tlajtlamach para okintlajyouiltij.
50 ¡Dios okimakau nochi itlauel!
Xokinkauilij ma nemikan,
yej okintemaktilij ipan mikilistli.
51 Yejua okichiu para ma mikikan
inyenkuiyokoneuan cada familia de Egipcio.
52 Kemaj okinkixtij itlapejpeniluan ken itlaj borreguitos,
niman okinyekan ipan on xalpatlajkan.
53 Okincuidarotiaj ipan ojtli
yejuan kuajli para xonomojtijkej,
pero on intlauelikniuan okintlapachoj on ueyi mar.
54 Ijkon Dios okinuikak ipan on tlajli yektli de Canaán,
ipan on tepemej yejuan okintekuilij ikan ipoder.
55 Yejua okinkuilij on yejuan xkixmatij Dios
inmixpan yejuamej israelitas.
On tlajli okinxexelouilij on tribus* ikan lotes,
niman okinchantij ipan campamentos.
56 Pero yejuamej oksejpa okitlatlatakej on ueyixtikaj Dios,
niman xipan okitakej
niman xokitlakamatkej itlanauatiluan.
57 No ijki tej, okichijkej ken intajuan.
Yejuamej no xipan okitakej toTEKO niman okitlalkauijkej.
¡Onolijkej kenon arcojtlaminajli noltik!
58 Okinchijchijkej tlaixpanmej para ídolos
yejuan okinmauistilijkej
niman ijkon sanoyej okualanijkej Dios.
59 Dios sanoyej okualan ijkuak okitak tlinon okichijkej,
yejua ika nomatstikaj okintlalkauij on israelitas.
60 Niman no okitlauelkau on tabernáculo ne Silo,
on kampa Dios inuan nosentlaliaya on tlakamej.
61 Okinkauilij itlauelikniuan para ma kuikan on yekcaja,
kampa onkaj iueyilis niman iueyi poder.
62 Temojtij ken okualan intechkopa itlapejpeniluan,
yejua ika okintemakak intech intlauelikniuan.
63 On telpokamej okintlatijkej;
on ichpokamej xakaj okipixkej para inuan ononamiktijkej.
64 On tiopixkej okinmiktijkej ikan espada,
niman on insiuakaualuan nion okinchokilijkej.
65 Pero toTEKO ken okochtlachix niman ouajnokuiteu,
ken yakaj soldado yejuan kochtlacha ijkuak xok tlauanki.
66 Okintlan itlauelikniuan niman okintotokak;
¡okimpijpinajtij para yeyika!
67 Xokinselij iuejkakoneuan José,
niman xokitlapejpenij itribu Efraín;
68 Pero yej okitlapejpenij itribu Judá
niman on itlajsojkatepeu Sión.
69 Kampa okichijchiu iyektiopan,
yejuan ueyixtikaj kenon cielo
niman tilintikaj kenon tlaltikpak
yejuan onyas para nochipa.
70 Dios okitlapejpenij David itekitkau,
yejuan tlajpixki katka ikan borregos.
71 Okejkuanij ne kampa kintlajpiyaya on borregos,
para yej okintlajpix itlapejpeniluan
niman ijkon onochiu tlajpixki de on israelitas.
72 Niman David okincuidaroj on israelitas,
itlapajpeniluan Dios.
Ijkon tej, sanoyej kuajli okincuidaroj
niman okinyekan ikan kuajli iyojlo.