Xkelnamiki iuejueyitlamiuisoluan toTEKO
77
NoTEKO sanoyej oniktlajtlanilij, para ma nechkaki.2 On tonajli ijkuak ninajmanaya oniaj itech noTEKO,
niman xonikajkau ika nomauan nikimpiyaya tlakpak
chika onikchiu oración ijkuak tlayoua.
Noalmajtsin xouel onoyoltlalij.
3 Onikelnamik noDios niman oninejeltij;
sa ika ninemi oninonemilij
hasta xok onikmat tlinon nikchiuas.
4 Tejua noTEKO xtinechpaleuiya ma nikochi;
¡Sanoyej nitlamachilispoliui,
niman xok nikmati tlinon nikijtos.
5 Nikelnamiki on tonaltin
niman xiutin yejuan yopanokej.
6 Nikelnamiki ijkuak tlayoua ninokuikatiaya.
Ipan noyojlo nitlanemiliaya, niman ijkin ninotlajtoltiaya:
7 ¿Tlen nochipa xok touan tinemis toTEKO?
¿Tlen xokaman techpiyalis iteiknelilis?
8 ¿Tlen yotlan itetlajsojtlalis?
¿Tlen, para yeyika yotlan ipromesa?
9 ¿Tlen manin Dios yej yokelkau ken techmakaya ikuajlilis?
10 Kemaj ijkin oninonemilij:
"On tlen más nechajmana
on pampa toueyiTajtsin iluikaknenketl
xok ijki nouika touan ken achtoj.
11 Más kuajli yej ma nikelnamiki on tlen ueyi tetlatlachaltij
yejuan okichiu toTEKO ipan on tonaltin yejuan yopanok.
12 Melauak, nejua nochipa nikelnamikis on tlen yejua okichiu.
13 "Ay Dios, tejua nochi yektli on tlen tikchiua.
¿Kanon nemi okse dios yejuan no ijki ken tejua?
14 ¡Tejua tión Dios yejuan kichiua tlamauisoltin!
¡Tejua otikintitij moueyipoder on naciones!
15 Ikan mopoder otikinmakixtij on motlapejpeniluan israelitas
yejuan tekoneuan itech Jacob niman José.
16 "Ay Dios, ijkuak on Mar Rojo omitsitak, omitsmakas,
niman on iau uejkatlan onkaj chikauak okoxon.
17 On kiautli oxin sanoyej chikauak,
niman ipan cielo sanoyej otlakomon,
niman nochiuiyan otlapetlan.
18 Okakistik motlajtol ikan tlakomonajli ipan on ajkomalakotl;
ipan in tlaltikpaktli nochiuiyan tlauilpantiya ika on tlapetlanajli,
niman on tlajli ouiuixkak.
19 Tejua otimojuitij ipan mar;
otikpanok on miyek atl,
pero xakaj ueli kita kampa oticholojtiaj.
20 Otikinyekan motlapejpeniluan
ken itlaj borreguitos itechkopa Moisés niman Aarón."