Dios yejua tetlanki
76
On chanejkej Judá kixmatij Dios,niman on chanejkej Israel kitlakaitaj.
2 Ichan onkaj ipan on yektepetl ne Jerusalén.
3 Ompa okintepojpostek on armastin:
escudos, espadas niman on tlaminaltin.
4 ¡Tejua toTEKO tiueyitetlatlachaltij!
¡Tejua más tiueyixtikaj
xken on tepemej yejuan nochipa onyaskej!
5 On yejuan más tlauelejkej soldados
de totlauelikniuan okintlakijkixtilijkej;
on yejuan más kojtikej xitlaj ouel okichijkej;
aman yejuamej okochkej para yeyika ijkuak okinmikmiktijkej.
6 Ijkuak otikinmajuak tejua iDios Jacob,
on carretas de guerra iuan on caballos xok ouel onejnenkej.
7 ¡Tejua sanoyej titemojtij!
¡Akinon uelis kixikos ijkatias mixpan
ijkuak sanoyej tikualani?
8 Desde nepa iluikak tikuajteijliaj on ika titeyolkuitis,
niman on tlaltikpaktlakamej nomojtiaj
niman xokuitlaj ueli kijtouaj.
9 Ay noTajtsin Dios,
timokuiteua para tikchiua tlen melajki,
niman tikinmakixtia on yejuan kintlajyouiltiaj.
10 Intlauel on tlakamej nokuepa para tejua sen ueyiteneualistli,
niman motlauelikniuan yejuan xmikij ipampa motlauel,
mitsueyiteneuaskej ipan on iluimej yejuan kichiuaj para teuaj.
11 Xmakakan toTEKO Dios on tlen onenkiprometerouilijkej,
niman nemejuamej yejuan nenchantij ipan on okseki naciones iyeualkan Israel,
xmakakan tetlayokoliltin ken yejua noneki kiselis.
12 Yejua kinpinatia on tekiuajkej
yejuan noueyimatij,
niman kinmojkakalaktilia on reyes
yejuan nemij ipan in tlaltikpaktli.