Dios yejua juez yolmelajki
75
¡Timitsmakaj tlaxtlauijli, toTEKO, timitsmakaj tlaxtlauijli!
Timitsyekteneuaj niman titokuikatiaj
de on tetlatlachalistin tejua tikchiua.
2 ToTEKO kijtoua:
"Yoniktlalij on tonajli ijkuak niteyolkuitis ikan yolmelajkilistli.
3 Ijkuak on tlajli uiuixka, iuan nochi on tlaltikpakchanejkej,
on nejua akin nikmanauiya para xuetsi.
4 Yejuamej on yejuan noueyiteneuaj
niman on xompayejyeuamej nikinmijlia:
"Maka sanoyej xteyakapanauikan,
nion maka sanoyej xmoueyimatikan;
5 Makasa xtenejtiakan ika nenkipiyaj poder,
nion maka sanoyej xyakapanauikan toTEKO."
6 Maka ijkon xchiuakan
pampa on teyolkuitilistli xualeuas kampaka kisa tonaltsintli,
noso kampaka kalaki,
nion kampa xalpatlajkan,
nion ipan tepemej.
7 Yej Dios yejua nochiuas teyolkuitijketl:
yejua sekimej kinmiknokaua niman sekimej kinueyiteneua.
8 ToTEKO kipiya ipan ima on kopa ikan itlauel,
on vino tlanelojli ikan tlajtlamach
para kichiua más kojtik niman ijtlakauki.
Ijkuak yejua kitoyauas on vino,
nochimej on xkuajkualtin tlakamej de in tlaltikpaktli
koniskej nochi hasta nochi kuajli kichichinaskej.
9 Pero nejua nochipa nikteijlis iueyilis iDios Jacob,
niman nikuikatlalis ikan ueyiteneualistli.
10 Yejua kinkixtilis impoder on xkuajkualtin tlakakamej,
pero kimakas poder on yejuan kuajli tlakatl.