Ueyikatsatsalistli ipampa Israel
74
¡Ay noTajtsin, ¿tline yotitechtlalkauij para nochipa?¡Tline sanoyej yotikualan topampa tejuamej,
yejuan ken timoborregos yejuan titechtlajpiyaj.
2 Xkinmelnamiki motlapejpeniluan,
yejuan yeuejkaui otikintlapejpenij,
yejuan otikinmanauij
para otikinmoyaxkatij on tribus.
Xkelnamiki Jerusalén
yejuan onkaj ipan on tepetl Sión
kampa tejua otichantik.
3 Xuajla niman xkitaki ken youejkau tlaxoxotontok;
on totlauelikniuan nochi okixoxotonijkej ipan moyektiopan.
4 On motlauelikniuan nokuikatiaj
ikan tetlanilistli ipan moyektiopan.
Okimpilokej tlakpak imbanderas
para teititiskej ika kipiyaj tetlanilistli.
5 Okitsojtsontekej on tsakuijlotl ikan hachas
ken tlatsojtsontekiskiaj ipan kojyoj.
6 Ijkon tej, ikan hachas niman martillos
okixoxotonijkej nochi on tlajmachyomej
yejuan tlachijchijtin ikan kojtli.
7 Okitlatlatilijkej moyektiopan;
xokitlakaitakej,
yej okixoxotonijkej hasta ipan tlajli.
8 Hasta okijtojkej ipan inyojlo para techpopoloskej;
¡Okintlatijkej nochiuiyan ipan on país
kampa titosentlaliayaj para timitsmauistiliayaj.
9 Xok tikintaj on tlamauisoltin yejuan tikchiua;
xok nemij on tiotlajtojkej,
niman nion tikmatij hasta kamanon tlamis.
10 Ay Dios,
¿hasta kamanon mitsuijuikaltitiaskej on motlauelikniuan?
¿Hasta kamanon mitsteneuilijtiaskej tlen xkuajli?
11 ¿Tline tikiyana moyekma
kampa tikipiya nochi mopoder?
¿Tline yej timomanepanoua moyelpan?
12 Desde yeuejkaui tejua tinoRey.
Tejua noDios, otitetlan miyekpa ipan in tlajli.
13 Tejua otiktlapoj ikan mopoder on ueyi mar;
otikinkuatetlapân on tejmotijkej uejueyi yolkej
yejuan nemiyaj ijtik on mar.
14 Otikintepaxoj itsontekouan
on tejmoti ueyi yolki itoka Leviatán,
niman otikinmakak inakayo on tekuanimej yolkej
yejuan nemij ipan xalpatlajkan.
15 Tejua otikinmeyaltij on ameyaltin,
niman on ayajtokmej yejuan notlalouaj,
niman yej otikinuats on uejueyi ríos.
16 Tejua moyaxka on tonajli niman on yeuajli;
tejuan otikchijchiu on metstli niman on tonaltsintli.
17 Tejua otiktlalilij kanon tlamis on tlaktikpaktli;
tejua otiktlalij ma onya on tonalko niman on seuayan.
18 NoTEKO,
xkita ken mitsuijuikaltiaj on yejuan motlauelikniuan,
niman on tlakamej tontos mitsijtouiliaj tlen xkuajli.
19 ¡Maka xtechelkaua para nochipa,
pampa tejuamej kenon tipalomas
yejuan xueli titopaleuiyaj.
¡Maka titechtemakas intech on tlakamej
yejuan ken xkuajkualtin yolkej!
20 ¡Xkelnamiki on pacto yejuan otiktlalij touan,
pampa in país tentikaj ikan tlauejli
nochiuiyan hasta ixoxomolko!
21 Maka xkauili ika ma nauiltikan on yejuan tlajyouiya.
¡Tejua xchiua ma mitsyekteneua
on yejuan tlajyouiya niman mayanki!
22 ¡NoTEKO, xmokuiteua niman xmomanaui!
¡Maka xkelkaua
ika mojmostla mitsuijuikaltiaj on tlakamej yejuan tontos!
23 Maka xkelkaua ken mitstsajtsiliaj on motlauelikniuan,
niman nochipa más chikauak mitstsajtsiliaj
on yejuan xipan mitsitaj.