On ikuajliyojlo Dios
73
¡Dios sanoyej kuajli iyojlo iminuan on itlapejpeniluan,on israelitas yejuan yolchipajkej!
2 Sa achijtsin opoliuito
niman nejua niuetsiskia ipan tlajtlakojli.
Nokxiuan ye nalauayaj.
3 pampa onikinnexikolitak
on xkuajkualtin tlakamej niman on noueyimatkej
ijkuak onikitak ika xitlaj kimpoloua.
4 Yejuamej xkomatstokej tla ye mikiskej
pampa chijchikatokej.
5 Yejuamej xtlajyouiyaj ken oksekimej,
nion xsa axkan kipanouaj ken oksekimej.
6 Yejua ika, yejuamej ken nokualtsintiliskiaj
ikan koskatl ika on iminueyimatilis, niman on tlauelîjlotl yejuan kichiuaj, ken yejua intlaken yeskia.
7 Sanoyej tojtomajkej imixtololojuan hasta yopankiskej,
niman sanoyej miyek kinemiliaj kichiuaskej tlen xkuajli.
8 Tekauetskaj, noueyimatij,
niman nion xpinauaj
para kichiuaj ikan tlauejli nochi tlen xkuajli.
9 Ika inkamak tlamach kijtouiliaj Dios,
niman ika innenepil tlamach kinmijtouiliaj
on tlaltikpaktlakamej nochiuiyan.
10 Yejua ika, on tlakamej kinyekteneuaj
niman xkinekij kitaskej ika yejuamej xkuajli kichiuaj.
11 Hasta kijtouaj:
"¿Kenijki Dios uelis kimatis on tlen xkuajli tichiuaj?
¿Tlen kinomakas cuenta on yejuan Más Ueyixtikaj?"
12 ¡Xkintakan on xompayejyeuamej!
Yejuamej inyolika ijkuak kimiyekiliaj iminriquezas.
13 ¡Tla ijkon, xitlaj ika nechpaleuiya tla niyolchipauak,
niman maski tla xnikchiuas tlajtlakojli!
14 Tej, nechmajmailia nochi tonajli
niman nechcastigarouaj cada kualkan.
15 Tla nejua nitlanemiliskia ken yejuamej,
nikintemaktiliskia mokoneuan.
16 Onikchiu kanika para nikajsikamatis
tline on xkuajualtin tlakamej ricojtiaj,
pero xoniuel pampa sanoyej ouijtikaj.
17 Pero ijkuak onikalak ipan iyektiopan Dios,
onikajsikamat tlinon nochiuas impan on xomapayejyejkej.
18 Tikintlalis kampa tlalaua,
niman tikonminmapeuas
ne kampa itlaj xkuajli impan nochiuas.
19 ¡Ipan se momento nopojpoloskej!
On nemojtijli nochimej kimpojpolos.
20 Iminemilis ken sen temiktli yejuan popoliui ijkuak tlachaj.
Ijkuak tejua, noTEKO, timokuiteuas,
tikchiuas para on xomapayejyejkej popoliuiskej
ken sen temiktli.
21 Ninemiya ika ajmantli,
niman ninoyolkokouaya,
22 pampa nitonto katka niman xnikajsikamatiya.
¡Mixpan ninemiya ken itlaj yolki!
23 Maski ijkon onikchiu, nochipa mouan ninemi.
Otinechmakitskij ipan noyekma.
24 Otinechyekan ika motetlakanonotsalis,
niman ijkuak tlamis in tlaltikpaktli tinechselis
ikan tetlakaitalistli.
25 ¿Akinon nikpiya ne ipan iluikak?
¡San tejua!
Pampa mouan ninemi,
xitlaj nikneki nikan ipan tlaltikpaktli.
26 Maski notlalnakayo niman notlamachilis tlamis,
Dios yejua noherencia para nochipa
niman yejua kipaleuiya noyojlo.
27 On yejuan mitstlalkauiyaj popololiuiskej;
tikimpopolos on yejuan xmitstlakamatij.
28 Pero nejua niknisiuis Dios.
Tej, para nejua Dios yejua sanoyej kuajli.
Tejua, noTEKO niman noDios,
tejua tinechmanauiya,
niman nejua nikteijlis nochi on tlajtlamach
yejuan yotikchiu.