Ueyikatsajtsilistli ipampa on rey
72
Ay Dios,xmaka on rey on moyolchipaualis,
niman on moyolmelajkilis,
2 para ijkon tekiuajtis ikan yolchipaualistli
niman ikan yolmelajkilistli impan on motlapejpeniluan
niman impan on mayankej.
3 Ma onya ipan on tepemej
niman ipan on tepetsitsimej yolseuilistli
niman kuajli melajkilistli
para nochimej motlapejpeniluan.
4 ¡On rey, ma kimpaleui on mayankej!
¡Ma kinmanaui inkoneuan on yejuan xitlaj kipijpiyaj,
niman ma kincastigaro on yejuan tetlajyouiltiaj!
5 On rey nochipa ma mitstlakaita,
ijkon ken nochipa onyaskej on tonaltsintli niman on metstli!
6 ¡Itekiuajyo ma nochiua kenon kiautli niman on ajuichtli
yejuan kajuichia on tlajli niman on sakayoj!
7 ¡Ma onya yolseuilistli
niman yolmelajkilistli nochi on tiempo
ijkuak yejua tlamandaros!
¡Ma tlamandaro hasta kaman xok onyas on metstli!
8 ¡Ma tlamandaro ipan uejueyitlalpanmej desde kampa peua on mar,
hasta kampa ontlami,
niman desde on río Éufrates,
hasta kampa tlami in tlaltikpaktli!
9 ¡On yejuan kitlauelitaj,
yejuan chantij ipan xalpatlajkan,
ma uajlakan ixpan
niman ma noknelikan!
10 ¡Ma kuajkuilikan tetlayokoliltin
niman impuestos on reyes
yejuan chantij ipan on región de Tarsis
niman ipan on tlaluaktin,
niman no, on reyes de Sabá niman de Sebá!
11 ¡Nochimej on reyes ixpan ma notlakuantelketsakan!
¡Nochimej on naciones ma kitekipanokan!
12 Ma ijkon nochiua pampa yejua kimanauis on mayanki
yejuan kitlajtlanilis ma kipaleui,
niman kimanauis on yejuan tlajyouiya,
yejuan xkipiya akinon kipaleuis.
13 Yejua kinmiknelis on yejuan yolyemankej
niman kinmanauilis innemilis on mayankej.
14 Yejua kinmanauis
on yejuan kintlajyouiltiaj niman kimpiya ikan tlauelîjlotl,
pampa innemilis sanoyej kixtlajsojtla.
15 ¡Ma ueyixtia on rey!
¡Ma kimakakan on oro yejuan kualeuitiaj ne Sabá!
¡Nochipa ma noueyikatsajtsilikan ipampa!
¡Nochipa ma kiseli tlatiochiualistli!
16 ¡Ma onya miyek trigo ipan on país,
niman ma onya miyek trigo ipan on tepemej!
¡Sanoyej miyek ma tlaki,
ken tlatlaki ipan on tepetl Líbano,
niman sanoyej ma miyekiya imiyauayo,
ijkon ken miyek xojtli onkaj ipan tepek!
17 ¡Maka kaman kelkauaskej itoka on rey;
sanoyej ma uejkaui ma kixmatikan,
ijkon ken uejkauis onyas on tonaltsintli!
¡Nochimej on naciones de in tlaltikpaktli
ma kiselikan tlatiochiualistli ipampa!
¡Nochimej on naciones, ma kitiochiuakan!
18 ¡Ma tikyekteneuakan toTEKO, Dios de Israel,
pampa san yejua ueli kichiua on uejueyi tlajtlamach.
19 Nochipa ma tikyekteneuakan iyektokatsin.
¡Nochi tlaltikpaktli ma temi ikan iueyilis!
¡Ma ijki nochiua!
20 Nikan tlamij on ueyikatsatsilistin
yejuan okichiu David, ikoneu Isaí.