Iueyikatsajtsilis sen ueuentsin
71
NoTEKO, motech tejua ninomanauiya;¡maka kaman tinechtlalkauis!
2 ¡Xnechpaleui niman xnechmakixti
pampa tiyolmelajki!
Xkaki tlinon nimitsijlia noTEKO,
niman xnechmakixti.
3 Tejua xmochiua kenon ueyi tetl
yejuan itech niniyanas.
No xmochiua kenon ueyikalpan
yejuan kuajli yeualtsakutikaj ikan sen tlakpak tepantli,
kampa uelis niniyanas.
Tejua xtlnauati para ma nechmanauikan.
4 NoDios, xnechmanaui de itech on xompayejyeua;
xnechmanaui de itech on yejuan teuijsoktinemi
niman temiktiani.
5 Ijkon xchiua pampa motech tejua noTEKO Dios,
nikpiya notlamachalis;
motech ninomanauiya desde nikonetl.
6 Desde ijkuak ninemiya ijtik nonanaj,
tejua ye tinechcuidarouaya,
niman otikchiu para onitlakat.
Nejua nochipa nimitsyekteneuas.
7 Sekimej hasta notlatlachaltiaj ijkuak nechitaj,
pampa tejua noTEKO sanoyej tinechmanauiya.
8 Nochi tonajli ikan nokamak nikyektenejtikaj moueyilis.
9 Maka tinechtlalkauis ijkuak ye niueuentsin yes;
nion maka tinechtlalkauis ijkuak xok nikojtik yes.
10 On yejuan nechtlauelitaj nechmiktisnekij;
yonechtlajtouilijkej para nechchiuiliskej tlen xkuajli.
11 Ijkin kijtouaj: "¡Xtojtokakan niman xkajsikan,
pampa Dios yokitlalkauij,
niman xakaj uelis kimanauis!"
12 Ay noTEKO, maka xnechtlalkaui;
¡nimantsin xnechpaleuiki!
13 ¡Ma nopinajtikan
niman ma xixinikan on yejuan nechteixpanuiya!
¡Ma nopinajtikan
on yejuan kinekij itlaj xkuajli nopan ma nochiua!
14 Pero nejua nochipa nikpiyas tlamachalistli
para xnechpaleui,
niman más, niman más, nimitsyekteneuas.
15 Nochi tonajli ikan nokamak nikteijlis,
ika tejua titemakixtia
niman tikchiua tlen melajki topampa,
maski nochi in xueli nikajsikamati.
16 Nikteijlis on tlajtlamach uejueyi
yejuan tejua noTEKO yotikchiu;
¡niktemachistis ika san tejua tiyolmelajki!
17 NoDios,
tejua yotinechajmachtijtiaj
desde ijkuak nitelpochtli katka,
niman hasta aman nikuajteijlijtiu
nochi on uejueyi tlajtlamach
yejuan otikchiu nopampa.
18 Maka tinechtlalkauis noDios,
nion ijkuak yoniueuentsintiak niman yonikuaistayak,
pampa on yejuan nemij niman yejuan uajnentiaskej,
poliui para nikinnojnotsas de moueyipoder.
19 Ay noDios,
on moyolmelajkilis, ajsi hasta ipan cielo.
Tejua yotikchiu uejueyi tlajtlamach;
¡xakaj nemi okse ken tejua!
20 Maski otinechpanoltij ipan miyek tlajyouilistli,
tejua oksejpa tinechyenkuilia,
niman xtinechkauilis ma nimiki.
21 Tejua más tinechmakas ueyilistli
niman oksejpa tinechyoltlalis.
22 Niman nejua noDios,
ninokuikatis kuikamej ika on tlatsotsonajli arpa
niman salterio, niman nimitsyekteneuas,
tejua Dios de Israel yejuan sanoyej tiYektli,
23 Sanoyej nipakis ijkuak nimitskuikatlalis ikan nokamak,
nochi noalma sanoyej pakis,
pampa tejua yotinechmakixtij.
24 Nochi tonajli nikteijlis ika tejua tiyolmelajki,
pampa sanoyej yonopinajtijkej
on yejuan kinekiyaj itlaj xkuajli nopan ma nochiua.