David noueyikatsajtsilia pampa sanoyej tlajyouiya
69
Xnechmakixti noDios,pampa on atl yoajsik hasta nokechtlan.
2 Yoniuetsito kampa tlasokitoka,
niman xkanaj kanon nicholos.
Yoniuetsito ijtik sen uejkatlan atl,
yejuan ye nechuikatikaj.
3 Yonisiau ika chikauak nimitstsajtsilia,
hasta yonechkokoj nokopak.
¡Nixtololojuan hasta xok tlachaj,
sanoyej youejkau nimitscha
para tinechpaleuis, noDios!
4 On yejuan sanoyej nechtlauelitaj,
más yomiyekiyakej xken notson
yejuan nikpiya ipan notsontekon.
Sanoyej yomiyekiyakej on notlauelikniuan
yejuan nechtlajyouiltiaj
maski xitlaj nikinchiuilia.
Yejuamej nechchiualtisnekij ma niktekuepili
on tlen nejua xniktekuilia.
5 NoDios, tejua tikmati ika sanoyej onikchiu tontojyotl;
xuelis nimitsiyanilis notlajtlakoluan.
6 NoTEKO Dios, akin nochi tiueli tikchiua,
¡maka nopinajtiskej san nopampa
on yejuan kitlaliaj inyojlo motech!
Dios de Israel,
¡maka nopinajtiskej san nopampa
on yejuan melauak kinekij mitsnextiskej!
7 San mopampa,
yonikijyouij nochi tlen xkuajli nechteneuiliaj;
niknekiskia maka yakaj ma nechita nixko
pampa sanoyej nipinaua.
8 ¡Hasta nokniuan nechitaj ken yakaj yejuan xkixmatij!
9 On tetlajsojtlalistli yejuan nikpiya ipampa moyektiopan,
san yejua onkaj ipan notlamachilis.
Yejua ika, ijkuak tlamach mitsteneuiliaj
sanoyej nechyolkokoua.
10 Ijkuak nichoka niman ninosaua, yejuamej nechpijpinauiyaj.
11 Tla niktlalia noajmankatlaken,
nochimej noka uejuetskaj.
12 Sa nochiuiyan nechtejteneuaj,
niman on tlauankej hasta nechkuikatlaliaj.
13 Pero nejua noTEKO, motech ninoueyikatsajtsilia.
NoDios, ¡xnechpaleui aman!
Ipampa moueyitetlajsojtlalis, ¡xnechnankili!
Pampa tejua melauak titemakixtia, ¡xnechmakixti aman!
14 ¡Maka tinechkauilis nipolakis ijtik on sokitl!
¡Xnechmanaui de on yejuan sanoyej nechtlauelitaj,
niman xnechmanaui maka nonuetsis ijtik on uejkatlan atl!
15 ¡Maka tikauilis ma nechuika on atepeyatl!
¡Maka tikauilis on amalakachtli ma nechtolo
nion maka nopan notsakuas!
16 Xnechnankili noTEKO.
¡Tejua sanoyej tikuajli ipan moyojlo
niman titechpiyalia moueyitetlajsojtlalis
yejuan xkaman tlamis!
Xnechita, pampa tejua sanoyej tiyolyemanki.
17 ¡Maka xnechiyanili moxayakatsin, nejua nimotekitkau!
¡Niman xnechnankili amantsin pampa sanoyej nitlajyouiya!
18 Xuajla niman xnechmakixti;
¡xnechmanaui intech on notlauelikniuan!
19 Tejua tikmati on tlen nechteneuiliaj,
on ika nechpijpinauiyaj,
niman ika xok nechtlakaitaj.
Tejua tikmatstikaj akinonmej notlauelinuan.
20 On tlen xkuajli nechteneuiliaj, sanoyej nechyolkokoua.
¡Xok noyolika, nion xok nikojtik!
Oniktejtemoj akinon nechyoltlalis niman nechiknelis,
pero xoniknextij.
21 Notlakual okitlalilijkej mikapajtli,
niman ijkuak onamik, onechonitijkej vinagre.
22 ¡Tejua xchiua para on iluitl kampa tlakuaj
ma nokuepa sen tlatlalijli para yejuamej!
23 ¡Xchiua para ma nokauakan ciegos
niman makasa ma tlachakan,
niman nochipa ma ikxikuekuetlakakan!
24 Imimpan ma uetsi motlauel,
¡niman nochi on tlauejli ma impan uetsi ken itlaj tlitl!
25 Ma tlaxixini ipan inkalpan,
niman ipan inkaluan makasa yakaj ma chanti,
26 pampa yejuamej kintlajyouiltiaj
on yejuan yotikincastigaroj,
niman inka uetskaj on yejuan tikincastigaroua.
27 Xkintlajtlakolmakaj nochi imintlajtlakoluan,
¡niman maka tikintlapojpoluis!
28 ¡Xpopolo imintoka ipan on amamoxnemilistli.
¡Maka tikintlalis ipan on lista
kampa nestikaj imintoka on yolchipajkej!
29 Pero nejua yejuan nikualo niman ninajmana,
noDios, xnechkuiteua, niman xnechmakixti.
30 Nikyekteneuas niman nikuikatlalis itokatsin noDios;
nikyekteneuas ikan tlajsojkamachilistli,
31 niman noTEKO más yolpakis
xken tla nikuentlaliliskia sen toro noso sen becerro
yejuan kuakuauej niman istiyej.
32 Ijkuak ijkon kitaskej on yejuan najmanaj,
sanoyej pakiskej,
niman on yejuan kitejtemouaj Dios, más noyoleuaskej,
33 pampa toTEKO kinkaki on yejuan mayankej,
niman xkinkaua on ikoneuan yejuan tsakutokej.
34 ¡ToTEKO, ma mitsyekteneuakan on yejuan nemij iluikak,
niman yejuan nemij ipan tlaltikpaktli niman ipan mar,
niman nochi kech kipiyaj nemilistli!
35 Nochi in nochiuas
pampa toTEKO kimakixtis on ueyikalpan Jerusalén
niman oksejpa kinkuektlalis on uejueyikalpanmej de Judá.
Kemaj on ikoneuan ompa nochantiskej
niman oksejpa kinoyaxkatiskej on tlajli.
36 On inkoneuan itekitkauan Dios kiseliskej
on tlajli ken herencia.
¡Niman nochimej on yejuan kitlajsojtlaj Dios,
ompa chantiskej!