On israelitas nejnemij ken tetlankej
68
Ijkuak Dios peua kinmixnamiki itlauelikniuan, yejuamej nochajchayauaj,
on yejuan sanoyej kitlauelitaj, cholojteuaj itech.
2 Yejuamej popoliuij ken itlaj poktli ipan ajakatl;
patij ken itlaj cera ipan tlitl.
¡Ixpan Dios, on xompayejyeuamej semi ixpolijtokej!
3 Pero on yejuan kuajli inyojlo kipiyaj paktli;
ixpan Dios sanoyej pakij.
¡Hasta tsikuinij ikan paktli!
4 Xkuikatlalikan toDios;
xmokuikatikan para xyekteneuakan iyektokatsin.
Xyekteneuakan on yejuan kistinemi ipan moxtli
ken se rey kistinemi ipan icarreta de guerra.
¡Xpakikan itech toTEKO!
¡Xpakikan yejua ixpan!
5 On Dios yejuan chanti ipan iyektiopan,
yejua nochiua ken imintataj on iknomej,
niman yejua kinmanauiya on kakaualtsitsimej.
6 Dios kinmaka sen chanyotl on yejuan xakaj impan tlacha,
kinmakaua on yejuan tsakutokej ipan cárcel,
niman kinmaka on tlen ika nopanoltiskej,
pero on yejuan xipan teitaj,
chantiskej ipan on tlajli kampa xtlatlaki.
7 Ay noDios, ijkuak otikinkixtij on motlapejpenilouan
ipan on país Egipto,
niman otikinyekan ipan on xalpatlajkan,
8 on tlajli ouiuixkak
niman on cielo okuajtitlan kiautli.
Mixpan tejua, Dios de Israel, ouiuixkak on tepetl Sinaí.
9 Ay noDios, tejua otikchiu para sanoyej ma kiaui
ipan on tlajli yejuan otitechmakak,
niman kemaj totlaluan kuajli otlatlakitikej.
10 On motlapejpeniluan ompa onochantijkej,
niman tejua, ikan moueyitetlajsojtlalis,
otikinmakak on tlen kimpolouaya.
11 ToTEKO okinmachistij ika yotetlankej,
niman miyekej siuamej ijkin otemachistijkej:
12 "¡On reyes niman insoldados yocholojtejkej!"
On siuamej, iminchan kinoxelouiliayaj on tlajtlamach
yejuan okinkuilijkej intlauelikniuan.
13 Okinkuilijkej on neskayomej de palomas
yejuan tlaixamiltin ikan plata,
niman inmastlakapaluan tlaixamiltin ikan oro yejuan más kuajli.
Pero sekimej nemejuamej onenmokajkej ipan on corrales.
14 Ijkuak on Dios yejuan nochi ueli kichiua,
okichiu ma cholojteuakan on reyes,
oneskej ken ijkuak tlasekuetsi ipan on tepetl Salmón.
15 ¡Sanoyej ueuejkapanmej on tepemej
yejuan onokej ipan on ueyitlalpan Basán.
16 Nemejuamej ueuejkapan tepemej,
¿Tline nenkinexikolitaj on tepetl
yejuan Dios okitlapejpenij para ompa chantis?
¡ToTEKO ompa chantis para nochipa!
17 Dios kimpiya millones de carretas de guerra
yejuan okinuajuikak desde on tepetl Sinaí
hasta ipan iyektiopan ne Jerusalén.
18 Ay noDios,
ijkuak otiaj ne iluikak otikinuikak
on yejuan tsakutikatkaj,
niman otikselij uentli de on tlaltikpaktlakamej.
Hasta on yejuan xipan teitaj,
motech onotemakakej noTEKO.
19 ¡Ma tikyekteneuakan toTEKO Dios niman toTemakixtijkau,
yejuan mojmostla techkixtilia on tlen techajmana!
20 ToDios, yejua sen Dios yejuan temakixtia,
niman ueli techmanauiya de on mikilistli.
21 Dios kinkuatlapanas on itlauelikniuan,
kinkuatlapanas on yejuan sanken kichiuaj tlajtlakojli.
22 ToTEKO okijtoj:
"Nimitskixtis ne Basán para nimitsajuikas,
nimitskixtis ijtik on mar kampa uejkatlan,
23 para ijkon, nenkicholoskej inyesyo on nemotlauelikniuan,
niman on nemotskuiuan kipajpaloskej on yestli."
24 Ay noDios niman noRey,
miyekej mokoneuan kalakij ipan moyektiopan
para mitsueyiliaj.
25 On nokuikatijkej yauij tlayakapan,
niman on tlapitskej yauij tlakuitlapan,
niman tlajkotian, yauij on ichpokamej kintsotsontiuij panderos.
26 ¡Nemochimej xyekteneuakan toTEKO Dios!
¡Ma kiyekteneuakan nochimej on israelitas
yejuan yonosentlalijkej!
27 Tlayakapan yauij iuejkakoneuan Benjamín,
on yejuan más konetl de yejuamej,
kemaj de ompa, yauij iuejkakoneuan Judá
on yejuan tlayekankej,
niman de ompa, yauij iuejkakoneuan Zabulón,
niman sa ika nochi, yauij iuejkakoneuan Neftalí.
28 NoTEKO, ma tikitakan moueyi poder;
¡oksejpa xtechititi ika titechpaleuiya!
29 Desde ipan on moueyitiopan, yejuan onkaj ne Jerusalén,
on reyes tlajtlamach mitsajtlayokoliaj.
30 Xkominnajua on egipcios,
yejuan ken sen xkuajli yolki yejuan chanti ijtik on asakayoj,
niman kenon tlauelejkej toros niman becerros.
pampa sanoyej kinekij ricojtiskej,
inka nauiltiaj intlauelikniuan.
¡Xkinchajchayaua on yejuan kuelitaj kichiuaj guerra!
31 Kemaj uajlaskej tlajtojkamej de Egipto,
niman on chanejkej Etiopía uej isijkapan nokneliskej motech.
32 ¡Xkuikatlalikan Dios, nemejuamej naciones de in tlaltikpaktli,
xmokuikatikan itech toTEKO,
33 yejuan kistinemi ne ipan cielo,
on cielo yejuan nochipa onkaj!
Xkakikan ken chikauak kakisti itlajtol,
on itlajtol yejuan kipiya nochi poder.
34 Xmatikan ika Dios kipiya poder;
yejua ueyixtikaj ipan nochi Israel;
ipoder ajsi hasta ipan on cielo.
35 Ueyi tetlakaitalistli kipiya Dios ipan iyektiopan.
On Dios de Israel kiminmaka fuerza on itlapejpeniluan.
¡Ma tikyekteneuakan Dios!